અમદાવાદમાં વર્લ્ડ કપની ફાઇનલ મેચ પહેલા SMCની મોટી કાર્યવાહી: ઓનલાઈન ક્રિકેટ બેટિંગ રેકેટ પર દરોડો, 2 શખ્સોની ધરપકડ
અમદાવાદના નિકોલ વિસ્તારમાં સ્ટેટ મોનિટરિંગ સેલ (SMC) દ્વારા એક મોટા ઓનલાઈન ક્રિકેટ બેટિંગ રેકેટ પર દરોડો પાડવામાં આવ્યો છે. આ કાર્યવાહી દરમિયાન પોલીસે બે આરોપીઓને ધરપકડ કરી છે અને સ્થળ પરથી મોબાઈલ ફોન, ટેબ્લેટ, લેપટોપ તેમજ ટીવી સહિત કુલ 3.43 લાખ રૂપિયાનો મુદ્દામાલ જપ્ત કરવામાં આવ્યો છે.
તપાસ દરમિયાન ખુલાસો થયો છે કે આ રેકેટ અત્યંત વ્યવસ્થિત રીતે ચલાવવામાં આવતું હતું. વિદેશી નંબરો અને અલગ-અલગ બેટિંગ આઈડીનો ઉપયોગ કરીને ઓનલાઈન સટ્ટો રમાડવામાં આવતો હતો. આ દરોડામાં માત્ર સ્થાનિક કનેક્શન જ નહીં, પરંતુ આંતરરાજ્ય લિંક પણ સામે આવી છે.
તપાસમાં બહાર આવ્યું છે કે આરોપીઓ SATSPORT9 અને VIPBET360 જેવી માસ્ટર આઈડી દ્વારા કરોડો રૂપિયાના સટ્ટાનું સંચાલન કરતા હતા. આ કેસમાં મુખ્ય સૂત્રધાર તરીકે દિલ્હીના આકાશ અને અનિલ કોટક નામના વ્યક્તિઓના નામ ખુલ્યા છે.આ કેસમાં અત્યાર સુધીમાં કુલ 46 જેટલા શખસોને વોન્ટેડ જાહેર કરવામાં આવ્યા છે.
આ પણ વાંચો :મિડલ ઈસ્ટમાં તણાવ: ભારતને મળી મોટી રાહત, 30 દિવસ સુધી રશિયન ઓઇલ ખરીદવાની અમેરિકા દ્વારા છૂટ આપવામાં આવી
વિદેશી નંબરો દ્વારા ઓપરેટ થતા આ રેકેટના મૂળિયાં કેટલા ઊંડા છે તે જાણવા માટે SMCએ વધુ તપાસ તેજ કરી છે અને ફરાર આરોપીઓને ઝડપી પાડવા માટે તપાસના ચક્રો ગતિમાન કર્યા છે.
