દક્ષિણ ગુજરાતમાં મેઘરાજાનું રૌદ્ર અને સૌરાષ્ટ્રમાં સૌમ્ય સ્વરૂપ
વાપી, વલસાડ, ખેરગામ જેવા વિસ્તારમાં ભારેથી અતિભારે વરસાદ
સૌરાષ્ટ્રમાં રાજકોટ, મોરબી, જામનગર, વાંકાનેરમાં મુશળધાર
બંગાળની ખાડીમાં સર્જાયેલા લો પ્રેશરની અસર ગુજરાત-સૌરાષ્ટ્રમાં જોવા મળી રહી છે અને મેઘરાજા સટાસટી બોલાવી રહ્યા છે. છેલ્લા ૨૪ કલાકમાં સમગ્ર રાજ્યમાં સાર્વત્રિક વરસાદ પડ્યો છે અને આ લો પ્રેશર ડીપ્રેશનમાં ફેરવાતા રાજ્યના વિવિધ ભાગોમાં મૂશળધાર વરસાદ પડવાની સંભાવના છે
છેલ્લા ૨૪ કલાકમાં રાજ્યના ૨૩૪ તાલુકામાં વરસાદ પડ્યો છે. સૌથી વધુ વરસાદ વાપીમાં ૧૩ ઇંચ નોંધાયો છે. આ સિવાય પારડીમાં ૧૨ ઇંચ, ઉમરપાડામાં ૧૧, ખેરગામમાં ૧૨, ધરમપુરમાં ૯, કપડવંજ, વસંડા, માંગરોળ, વ્યારા અને સોનગઢમાં ૭ ઇંચ, વઘઈ, આહવા, કડીમાં પાંચ ઇંચ, પાવી જેતપુર, ખાનપુર.ઓલપાડ, કવાંટ, મેંદરડા, દાહોદમાં ત્રણથી ચાર ઇંચ, પાલનપુર, દહેગામ, તારાપુર, લીમખેડા, વિસાવદર, વાલોડ, નેત્રંગ, ચીખલી, પલસાણા અને ડોલવણમાં સરેરાશ ત્રણ ઇંચ નોંધાયો છે. સૌરાષ્ટ્રમાં પણ રાજકોટ, જામનગર, મોરબી, વાંકાનેર, હળવદ, માળિયા પડધરી, જેવા શહેરોમાં વરસાદ પડ્યો છે.
વલસાડ જિલ્લાની ઔરંગા નદીમાં ઘૂઘવતા પૂર વહી રહ્યાં છે. આજે આ નદીના પાણી ધમડાચી ગામમાં ઘુસી ગયા હતા. આ પરિસ્થિતિમાં લોકોની ઘરવખરીને ભારે નુકસાન પહોંચ્યુ હતું.
સુરત જિલ્લામાંથી પસાર થતી કીમ નદી બે કાંઠે વહી રહી છે. માંગરોળના મોટા બોરસરા ગામનો હાઇવે બેરલ બ્રિજ પાણીમાં ગરકાવ થયો હતો. કીમ નદી બે કાંઠે થતાં નદીને અડીને આવેલા કઠોદરા, કીમામલી, મોટાં બોરસરા, પાનસરા, ઉમરાછી સહિતના ગામોને એલર્ટ કરાયા હતા.
