- બોગસ ડૉક્ટર છેલ્લા એક વર્ષથી દરરોજ ૫૦થી વધુ દર્દીઓને દવા-ઈન્જેક્શન આપતો’તો: અગાઉ ત્રણવાર પકડાયો છતાં સુધર્યો નહીં
- પેટ્રોલપંપનો મેનેજર અમદાવાદથી બીજી વખત ડ્રગ્સની ખેપ મારીને લાવ્યો; વેચે તે પહેલાં જ પકડાઈ ગયો
સ્પેશ્યલ ઓપરેશન ગ્રુપ (એસઓજી) દ્વારા ગાંજા-ચરસ-ડ્રગ્સ સહિતના નશીલા પદાર્થના વેચાણનું નેટવર્ક તોડી પાડવા એક બાદ એક દરોડા પાડવામાં આવી રહ્યા છે સાથે સાથે દર્દીઓના સ્વાસ્થ્ય સાથે હિન ચેડાં કરતાં બોગસ ડૉક્ટરોને પણ સાણસામાં લેવાનું શરૂ કરાયું છે. આવો જ વધુ એક બોગસ ડૉક્ટરને પકડી પાડવા ઉપરાંત ડ્રગ્સના જથ્થા સાથે પેટ્રોલપંપ મેનેજરને પકડી લેવામાં આવ્યો હતો.
એસઓજીના પીઆઈ એસ.એમ.જાડેજાના માર્ગદર્શન હેઠળ જયદીપસિંહ ચૌહાણ, અનોપસિંહ ઝાલા સહિતના સ્ટાફે આજીડેમ ચોકડી પાસે માંડા ડુંગર વિસ્તારમાં શ્રી રામ પાર્ક મેઈન રોડ પર બાપા સીતારામ ડેરી સામે સંજીવની ક્લિનિક શરૂ કરીને દર્દીઓને દવા આપી રહેલા સંજય રસિકભાઈ સોમપરા (ઉ.વ.૫૯)ને હોસ્પિટલના સાધનો, એલોપિથક દવાઓ, ઈન્જેક્શન સહિતના જથ્થા સાથે પકડી પાડ્યો હતો. પૂછપરછમાં સંજયે જણાવ્યું હતું કે તે છેલ્લા એક વર્ષથી કોઈ પ્રકારના લાયસન્સ વગર સંજીવની ક્લિનિક ચલાવી રહ્યો હતો. તેને ત્યાં દરરોજ ૪૦થી ૫૦ દર્દીઓ અલગ-અલગ બીમારીની દવા લેવા આવતા હતા અને તે ૩૦ રૂપિયા ફી લઈને સારવાર કરી આપતો હતો ! અગાઉ તેણે કમ્પાઉન્ડર તરીકે નોકરી કરી હોય દવા વિશે જાણકારી હોવાનું રટણ પણ કર્યું હતું. સંજય અગાઉ ત્રણ વખત આ પ્રકારે પકડાઈ ગયો હોવાનું પણ ખુલ્યું છે.
આ ઉપરાંત એસઓજીએ ૬.૧૪ ગ્રામ મેફેડ્રોન ડ્રગ્સના જથ્થા સાથે જામનગર રોડ પર માધાપર ચોકડી પુલ નીચેથી ગુલામઅહેમદ દિલાવરભાઈ જાખરા (ઉ.વ.૩૧, રહે.લાઠી)ને પકડ્યો હતો. પૂછપરછમાં તેણે જણાવ્યું કે તે લાઠીમાં પેટ્રોલપંપ મેનેજર તરીકે નોકરી કરે છે સાથે જ ડ્રગ્સનો બંધાણી હોવાથી તે અમદાવાદના જુહાપુરાથી ડ્રગ્સ લાવ્યો હતો. આ ડ્રગ્સ તે પીવા માટે અને રાજકોટમાં વેચવા માટે લાવ્યો હોવાની કબૂલાત આપી હતી.
