રાજકોટ શહેર પોલીસના પગાર અટવાયા : હેડ ક્વાર્ટરના કર્મીઓને ડબલ માર, રજા-પગારથી પણ વંચિત !

રાજકોટ શહેર પોલીસમાં મહિનો વિત્યો પહેલી તારીખે એકાઉન્ટમાં પડતી સેલેરી (પગાર) પાંચ દિવસ વિત્યા બાદ હજુ થયો નથી. રાજ્યભરમાં પોલીસ ડિપાર્ટમેન્ટમાં પગાર રેગ્યુલર પ્રથમ તારીખે થઈ ગયો પરંતુ રાજકોટ સિટી પોલીસનો પગાર આ વખતે મિલકત પત્રક, કર્મયોગી એપના કારણે અટવાતા પગાર જ જેઓનો આધાર છે એવા પોલીસ કર્મીઓ માટે થોડી કઠણાઈ થઈ છે અને પગારની રાહમાં છે.

રાજકોટ શહેર આવો કોઈ પોલીસમાં પણ ગ્રાન્ટ કે ઈસ્યુ ન હોય તો નિયમિતપણે મહિનાના પ્રથમ દિવસે (પહેલી તારીખે) બેન્ક એકાઉન્ટમાં સેલેરી જમા થઈ જાય છે. આ વખતે પાંચ દિવસ વિત્યે નાના કર્મચારીઓના બેન્ક એકાઉન્ટ ખાલી છે. પગાર નથી થયો. જો કે રાજ્યભરમાં પોલીસને પગાર મળી ગયો છે. રાજકોટ સિટી પોલીસમાં પગાર ડીલે થવા બાબતે જાણવા મળ્યા મુજબ મિલકત પત્રક, કર્મયોગી એપને કારણે પગાર અટવાયો છે.

કર્મયોગી એપ-મિલકત પત્રકમાં કર્મચારીએ પોતાનું નામ, નંબર, તેના નામે કાઈ સ્થાવર અને જંગમ મિલકતો, મકાન, પ્લોટ, વાહન, સોનુ, ઝવેરાત કે કાંઈ આવું હોય તો દર્શાવવાનું હોય છે. રાજકોટ સિટી પોલીસ પાસે પણ આ વિગતો મંગાઈ હતી અને એપ મિલકત પત્રક બાદ પગાર થનાર હોવાનું જાણવા મળે છે. પોલીસના આંતરિક વર્તુળોમાંથી જાણવા મળ્યા મુજબ પીઆઈ કે એથી ઉપરી અધિકારીઓના પગાર રેગ્યુલર થઈ ચૂક્યા છે. નાના કર્મચારીઓના પગાર મિલકત પત્રક, એપના કારણે મોડા છે. સંભવતઃ એક-બે દિવસમાં તમામ કર્મચારીઓના પગાર થઈ જશે. હવે દર વર્ષે મિલ્કત પત્રક ભરવાના હોય કેટલાક કર્મચારીઓને પત્રક ભરવાની ઢીલાશના કારણે પણ અન્ય કર્મચારીઓના પગાર ફસાયાનો ગણગાટ છે.

મહત્વની બ્રાન્ચો, ફિલ્ડવર્કના કર્મીઓને કદાચ અસર નહીં પડતી હોય?

નાના કર્મચારીઓના પગાર અટવાતા જેમાં જેઓ મહત્વની ક્રાઈમ, પીસીબી, એસઓજી. ઈઓડબલ્યુ કે આવી ફિલ્ડ વર્ક કરતી બ્રાન્ચમાં નથી તેઓને વધુ મુશ્કેલી હશે. મહત્વની બ્રાન્ચમાં પણ એવા ‘કર્મયોગી’ કર્મીઓ હશે કે જેઓને પહેલી તારીફનો (પગાર)નો ઇંતેજાર કે માત્ર પગાર પર જ હશે તેઓને પણ પગારની રાહ હશે. બાકી જેને પગાર જાણે જમ્યા પછીના મુખવાસ જેવો લાગતી હશે તેવા બાબુઓ માટે બે-પાંચ પંદર દિવસ મોડો આવે તો શું ફેર પડે તેવું કદાચ હશે. જો કે પગાર એ મહેનત કી કમાઈ હોય એટલે ઇંતેજાર તો રહેતો હોય. સરવાળે કર્મયોગી એપને લઈને ખરા અર્થમાં ‘કર્મયોગી’ (નોન કરાર) કર્મીઓને વધુ મુશ્કેલી હશે.

હેડ ક્વાર્ટરના કર્મીઓને ડબલ માર: રજા પગારથી પણ છે વંચિત !

પોલીસ હેડ ક્વાર્ટરમાં ફરજ બજાવતા પોલીસ કર્મીઓને તો ફિલ્ડવર્ક કે પબ્લિક વચ્ચે રહેવાનું કામ આવતું ન હોય, કેદીઓના જાપ્તા કે આવા બંદોબસ્તની ફરજ રહેતી હોય છે માટે તેઓનો મુખ્ય મદાર તો પગાર જ હોય છે. (જો કે ફિલ્ડમાં ફરજ બજાવતા પણ અનેક એવા કર્મીઓ હોય છે કે માત્ર પગાર જ લે અન્ય કાંઈ નહીં) તેઓને પગાર મોડો થયો છે. સાથે રજા પગાર (જાહેર રજાઓમાં બજાવેલી ફરજનો મળતો પગાર) પણ થયો નથી. હેડ ક્વાર્ટરના કર્મીઓ માટે રજા પગાર એ આધાર હોય છે. રજા પગાર પણ મળ્યો ન હોવાથી પોલીસ હેડ ક્વાર્ટરમાં ફરજ બજાવતા કર્મચારીઓને તો ડબલ માર પડયા જેવું થયાનો કર્મીઓમાં ગણગણાટ હશે. પગાર પર રહેતા ‘કર્મયોગી’ કર્મીઓને પગારની વધુ રાહ હશે.