પાકિસ્તાનની અવળચંડાઈ : ઓખાની ફિશિંગ બોટ પર કર્યું ફાયરિંગ, ભારતીય કોસ્ટગાર્ડે માછીમારોનો જીવ બચાવ્યો

 ભારતનો પાડોશી દેશ પાકિસ્તાન જાણે સુધરવાનું નામ જ નથી લઈ રહ્યો. ફરીએક વાર પાકિસ્તાનની અવળચંડાઈ સામે આવી છે. રવિવારે મોડી રાત્રે પાકિસ્તાન મરીન દ્વારા ગુજરાતના દરિયા કિનારા નજીક ફાયરિંગ કરવામાં આવ્યું હતું, જેના કારણે માછીમારોની બોટ ડૂબી ગઈ હતી. જોકે, સદનસીબે માછીમારોનો બચાવ કરી લેવામાં આવ્યો હતો. પરંતુ ઓખા માછીમારની બોટ દરિયામાં ડૂબી ગઈ હતી. સમગ્ર ઘટનામાં ભારતીય કોસ્ટગાર્ડ દ્વારા માછીમારોનો બચાવ કરવામાં આવ્યો હતો.

કોસ્ટગાર્ડે માછીમારોનો કર્યો બચાવ

મળતી માહિતી મુજબ રવિવારે અરબી સમુદ્રમાં IMBL નજીક ફાયરિંગની ઘટના બની હતી. જેમાં ભારતીય માછીમારોની બોટ પર પાકિસ્તાન મરીન દ્વારા ફાયરિંગ કરાવામાં આવ્યું હતું. જોકે, પાકિસ્તાન તરફથી ફાયરિંગ થતાં જ ઇન્ડિયન કોસ્ટગાર્ડની ટીમ તુરંત ઘટનાસ્થળે પહોંચી અને માછીમારોનો આબાદ બચાવ કર્યો હતો. જોકે, સમગ્ર ફાયરિંગની ઘટનામાં માછીમારોની બોટમાં નુકસાન થતાં તે પાણીમાં ડૂબી ગઈ હતી. નોંધનીય છે કે, સમગ્ર ઘટના દરમિયાન કોઈ જાનહાનિ નોંધાઈ નથી.

ગુજરાતના માછીમારોમાં ભયનો માહોલ

બપોર બાદ કોસ્ટગાર્ડની ટીમ માછીમારોને ઓખા બંદરે લઈને આવશે તેવું જાણવા મળી રહ્યું છે. ભારતીય જળ સીમા નજીક પાક મરીન દ્વારા ફાયરિંગની ઘટના બનતા ગુજરાતના માછીમારોમાં પણ ભયનો માહોલ જોવા મળી રહ્યો છે.જોકે માછીમારની બોટ દરિયામાં ડૂબી જવાની આ ઘટનામાં ભારતીય કોસ્ટગાર્ડની સમયસર કરવામાં આવેલ બચાવને કારણે માછીમારોનો બચાવ કરવામાં સફળતા મળી હતી