અમદાવાદ એરપોર્ટ ઉપરથી NRI સિવાયના પેસેન્જર પણ દારૂ ખરીદતા હતા, શોપ જ બંધ કરી દેવાઈ
પ્રોહિબિશન અને એક્સાઈઝ વિભાગે ગેરકાયદે આઉટલેટ ગણીને બંધ કરી દીધું
અમદાવાદ એરપોર્ટ પર ગેરકાયદેસર લીકર શોપ બંધ કરી દેવામાં આવી છે. ડ્યૂટી ફ્રી શોપ બધા જ પેસેન્જરને દારૂ વેચતી હોવાનું સામે આવતા કડક પગલાં ભરાયા છે. નિયમો પ્રમાણે તેઓ માત્ર ઈન્ટરનેશનલ અને NRI પેસેન્જર્સને જ દારૂનું વેચાણ આ શોપથી કરી શકે છે. કારણ કે ગુજરાત એક ડ્રાય સ્ટેટ છે જેથી આ પ્રમાણેનું વેચાણ પણ ગેરકાયદેસર ગણી કડક પગલા ભરાયા છે.
અમદાવાદનાં સરદાર વલ્લભભાઈ પટેલ ઈન્ટરનેશનલ એરપોર્ટ પર ડ્યુટી ફ્રી લીકર શોપને સ્ટેટ પ્રોહિબિશન એન્ડ એક્સાઈઝ ડિપાર્ટમેન્ટ દ્વારા બંધ કરી દેવામાં આવી છે. સુત્રોએ આપેલા સમાચાર પ્રમાણે આ ડ્યુટી ફ્રી લીકર શોપમાંથી ગેરકાયદેસર રીતે NRI સિવાયના ગુજરાતી પેસેન્જરોને પણ દારૂ વેચવામાં આવી રહ્યો હતો.
ગુજરાતમાં દારુ બંધી છે પરંતુ કોઈપણ પેસેન્જર અહીં આવે તે દારૂની ખરીદી કરીને જતો હતો. એટલે કે ડ્યુટી ફ્રી શોપમાંથી નોર્મલ એક પેકેજ ટૂર પર ઈન્ટરનેશનલ ટ્રિપ મારીને આવેલા લોકોને પણ દારૂ વેચી દેવામાં આવતો હતો. એટલું જ નહીં આ લીકર શોપ પાસે યોગ્ય NOC પણ નહોતું જેથી કરીને કાર્યવાહી કરવામાં આવી છે.
લીકર શોપ દરેક પેસેન્જરને દારૂ વેચતી
વિદેશ ફરવા જતા અથવા માત્ર ફરીને પરત ફરેલા ગુજરાતીઓ પણ આ ડ્યુટી ફ્રી લીકર શોપમાંથી દારૂ ખરીદી લેતા હતા. તેવામાં મુંબઈ ટ્રાવેલ રિટેઈલ પ્રાઈવેટ લિમિટેડ દ્વારા આ લીકર શોપ ઓપરેટ કરાતી હતી. જે SVPI એરપોર્ટ પર બધાને દારૂ વેચતા ગેરકાયદેસર વેચાણ કરતી નજરે પડી અને NOC પણ પ્રોપર ન હોવાથી બંધ કરવામાં આવી હતી.
માત્ર વિદેશથી આવેલા પેસેન્જરને વેચવાની અનુમતિ
પ્રોહિબિશન અને એક્સાઈઝના ડિરેક્ટર LM ડિંડોલે કહ્યું કે ગુજરાતમાં પ્રોહિબિશન એક્ટ લાગુ છે, જેથી અહીં ડ્યુટી ફ્રી શોપ્સે લીકર સેલ કરવા માટે અમારા ડિપાર્ટમેન્ટ માટે પ્રોપર NOC મેળવવું પડે છે. રાજ્યના પ્રોહિબિશન રૂલ્સ પ્રમાણે લીકર માત્ર અહીં NRI અને ફોરેન ટૂરિસ્ટને જ ડ્યુટી ફ્રી શોપથી વેચવામાં આવી શકે છે. જોકે અમારી તપાસમાં સામે આવ્યું કે આ શોપ કોઈપણ પેસેન્જર જે અહીં ડ્યુટી ફ્રી શોપથી ખરીદી કરવા આવતું તેને પ્રોડક્ટ સેલ કરી દેવાતી હતી. તેથી જ આને ઈન્ટરનેશનલ એરપોર્ટ પરની ગેરકાયદેસર લીકર આઉટલેટ તરીકે ગણી અમે કડક પગલાં ભર્યા છે.
તેમણે વધુમાં કહ્યું કે અમને જ્યારે આ લૂપ હોલ અંગે જાણ થઈ ત્યારે અમે તાત્કાલિક એક નોટિસ ફટકારી અને આ લીકર આઉટલેટને બંધ કરાવી દીધું હતું. ઉલ્લેખનીય છે કે આ શોપ પાસે વર્ષ 2005માં અમારા ડિપાર્ટમેન્ટ દ્વારા ઈશ્યૂ કરાયેલું NOC હતું પરંતુ તેમાં અપડેશન કે વેલિડેશન કરાયું નહોતું. તેથી કડક પગલાં ભરવા પડ્યા.
