ગુજરાતના 21 જિલ્લામાં આજે મેઘરાજા થશે મહેરબાન, હળવાથી મધ્યમ વરસાદની હવામાન વિભાગે કરી આગાહી

કેરળમાં ચોમાસું વહેલું બેસ્યા બાદ મુંબઈ, મહારાષ્ટ્રને પણ મેઘરાજા ધમરોળી રહ્યા છે. ત્યારે ગુજરાતમાં પણ ચોમાસાનું વહેલું આગમન થવાનું છે. ત્યારે આજે હવામાન વિભાગ દ્વારા રાજ્યના 21 જિલ્લામાં વરસાદની આગાહી કરવામાં આવી છે. બુધવારથી જ (28 મે) મોડી રાત્રિથી જ અનેક જિલ્લામાં વરસાદ પડી રહ્યો છે ત્યારે આજે રાજ્યના 21 જિલ્લામાં વરસાદની સંભાવના વ્યક્ત કરવામાં આવી છે. ત્યારે ચાલો જાણીએ કયા વિસ્તારમાં આજે મેઘરાજા મન મૂકીને વરસશે.

21 જિલ્લામાં પડી શકે છે વરસાદ

હવમાન વિભાગે રાજ્યના 21 જિલ્લામાં વરસાદની આગાહી કરી છે જેમાં 7 જિલ્લામાં હળવાથી મધ્યમ વરસાદની સંભાવના વ્યક્ત કરવામાં આવી છે જેમાં પંચમહાલ, છોટા ઉદેપુર, નર્મદા, તાપી, ડાંગ અને ભાવનગરનો સમાવેશ થાય છે તેમજ 13 જિલ્લામાં મધ્યમ વરસાદ વરસશે જેમાં બનાસકાંઠા, પાટણ, સુરેન્દ્રનગર, મહેસાણા, સાબરકાંઠા, અરવલ્લી, મહિસાગર, ગાંધીનગર, અમદાવાદ, ખેડા, આણંદ, વડોદરા, ભરૂચનો સમાવેશ થાય છે. સાંજે 8:30 સુધીમાં જિલ્લામાં મધ્યમ વરસાદ અને હળવો વરસાદ પડી શકે છે.અમરેલી જિલ્લામાં છૂટો છવાયો ધીમો વરસાદ નોંધાવાની સંભાવના વ્યક્ત કરવામાં આવી છે.

આ પણ વાંચો : રાજકોટમાં બન્યા ભારતની પ્રથમ AI આધારિત ટેન્ક ‘જોરાવર’ના પાર્ટસ : જાણો કેમ અપાયું જોરાવર નામ, શું છે ટેન્કની ખાસિયત?

30-31 મે અને 1 જૂન આ જિલ્લામાં પડશે વરસાદ

રાજ્યમાં વરસાદને લઈને હવામાન વિભાગ દ્વારા સંભાવના વ્યક્ત કરવામાં આવી છે તે મુજબ રાજ્યમાં આગામી 30 મેના રોજ મહીસાગર, પંચમહાલ, દાહોદ, વડોદરા, છોટા ઉદેપુર, ભરૂચ, નર્મદા, સુરત, તાપી, ડાંગ, નવસારી, વલસાડ, ગીર સોમનાથ, અમરેલી, ભાવનગર અને 31 મે અને 1 જૂનના રોજ ગીર સોમનાથ, અમરેલી, ભાવનગર, સાબરકાંઠા, અરવલ્લી, સુરત, તાપી, ડાંગ, નવસારી, વલસાડ જિલ્લાના છૂટાછવાયા સ્થળોએ ગાજવીજ સાથે હળવાથી મધ્યમ વરસાદ પડી શકે છે.

2-3 જૂનની આગાહી

આ વર્ષે ચોમાસાનું આગમન વહેલું થઈ ગયું છે ત્યારે જૂન મહિનાની શરૂઆતમાં જ મેઘરાજા બઘડાટી બોલાવશે તેવું લાગી રહ્યું છે. આગામી 2-3 જૂનના રોજ જૂનાગઢ, અમરેલી, ભાવનગર, ગીર સોમનાથ, ભરૂચ, સુરત, તાપી, ડાંગ, નવસારી, તાપી, નર્મદા, વલસાડ, અરવલ્લી, મહીસાગર, દાહોદ, પંચમહાલ, છોટા ઉદેપુર જિલ્લાના છૂટાછવાયા સ્થળોએ ગાજવીજ સાથે હળવાથી મધ્યમ વરસાદને લઈને હવામાન વિભાગે આગાહી કરી છે.