ઈરાન શાંતિ સમજૂતીમાંથી બહાર, વિદેશ મંત્રાલયની સતાવાર ઘોષણા
અમેરિકી ઘેરાબંધી અને હોર્મુઝ મુદે પડેલી મડાગાંઠે શાંતિની આછી પાતળી આશા ઉપર પણ પાણી ફેરવું દીધું
તેહરાને અમેરિકા સાથે ગયા મહિને થયેલી યુદ્ધવિરામ સમજૂતી (MoU)માંથી સત્તાવાર રીતે બહાર નીકળવાની જાહેરાત કરી છે. ઈરાને આરોપ લગાવ્યો છે કે અમેરિકાએ સમજૂતીની જોગવાઈઓનો વારંવાર ભંગ કર્યો છે અને ઈરાનના બંદરો પર ફરીથી નૌકાબંધી લાદીને સમગ્ર સમજૂતીને નિરર્થક બનાવી દીધી છે. હોર્મુઝની સામુદ્રધુની ઉપર નિયંત્રણને લઈને બંને દેશો વચ્ચેનો ટકરાવ વધુ ઉગ્ર બનતાં મધ્યપૂર્વ ફરી એક વખત વ્યાપક યુદ્ધના આરે પહોંચી ગયો છે.
અમેરિકી સૈન્યએ બુધવારે વહેલી સવારે ઈરાનના બંદરો પર ફરીથી નૌકાબંધી અમલમાં મૂકી હતી. તેના જવાબમાં ઈરાને અમેરિકી દળોને આશ્રય આપતા દેશો તરફ નવા હુમલાઓ શરૂ કર્યા હતા.પરિણામે ગયા મહિને થયેલી શાંતિ સમજૂતી લગભગ તૂટી પડી હોવાનું ચિત્ર ઉપસ્યું હતું અને હવે ઈરાને સતાવાર જાહેરાત કરી દીધી છે.
ઈરાનના વિદેશ મંત્રાલયે જણાવ્યું કે અમેરિકા હવે સમજૂતીનું પાલન કરતું ન હોવાથી તેહરાન પણ હવે તેની કોઈ જોગવાઈથી બંધાયેલું નથી. ઈરાનના નાયબ વિદેશ મંત્રી કાઝેમ ગરીબાબાદીએ કહ્યું કે હોર્મુઝની સામુદ્રધુની પર સંપૂર્ણ નિયંત્રણ મેળવવું ઈરાનની રાષ્ટ્રીય સુરક્ષા માટે અનિવાર્ય છે, ભલે તેની કોઈ પણ કિંમત ચૂકવવી પડે.
આ પણ વાંચો: પોરબંદરના કુછડી ખાતે મરીન શીપ બિલ્ડીંગ પાર્કની યોજના: ટૂંક સમયમાં સરકાર નીતિ જાહેર કરશે
તેમણે વધુમાં કહ્યું કે સામાન્ય સંજોગોમાં હોર્મુઝ પર ઈરાન અને ઓમાન બંનેનું નિયંત્રણ રહે છે, પરંતુ યુદ્ધકાળમાં સમગ્ર સામુદ્રધુની પર ઈરાનનું નિયંત્રણ જરૂરી બની જાય છે. તેમણે સ્પષ્ટ કર્યું કે ઈરાન હવે અમેરિકા સાથે કોઈ નવી વાટાઘાટોની માંગ નહીં કરે.
ખર્ગ ટાપુ કબજે કરવાની ટ્રમ્પની ધમકી
અમેરિકાના રાષ્ટ્રપતિ ડોનાલ્ડ ટ્રમ્પે ઈરાનના મહત્વના ખર્ગ ટાપુ પર કબજો જમાવવાની ખુલ્લી ધમકી આપી છે. તેમણે કહ્યું કે જો જરૂરી બનશે તો અમેરિકા ઈરાનના વીજ ઉત્પાદન મથકો અને દરિયાના પાણીને પીવાનું બનાવતા ડિસેલિનેશન પ્લાન્ટોને પણ નિશાન બનાવશે.
ટ્રમ્પે કહ્યું, “કદાચ અમે ખર્ગ ટાપુનો કબજો લઈ લઈએ. જો અમે એવું કરીશું તો ઈરાન તેને રોકી શકશે નહીં.” ખર્ગ ટાપુ ઈરાનના તેલ નિકાસ માટેનું સૌથી મહત્વપૂર્ણ કેન્દ્ર ગણાય છે. તેના પર કોઈ પણ પ્રકારની કાર્યવાહી વૈશ્વિક તેલ બજારમાં ભારે ઉથલપાથલ સર્જી શકે છે.
