નવરાત્રિ પહેલા હેલ્મેટ ફરજિયાત કરો…ગુજરાત હાઇકોર્ટ ફરી હેલ્મેટનાં કાયદા અંગે થઈ કડક

ગુજરાત હાઇકોર્ટ ફરી એક વખત હેલ્મેટનાં કાયદા અંગે કડક થઇ છે અને રાજ્ય સરકારને જરૂરી નિર્દેશો આપ્યા છે. આજે ટ્રાફિક સમસ્યા અંગેની સુનાવણી દરમિયાન હાઇકોર્ટે રાજ્ય સરકારને હેલ્મેટ પહેરવાના નિયમને સખત રીતે પાલન કરાવવા આદેશ આપ્યો છે અને જણાવ્યું છે કે, જે કોઈ વ્યક્તિ હેલ્મેટ પહેરતા ન હોય તેઓને ડ્રાઇવિંગ લાઇસન્સ પણ સસ્પેન્ડ કરવા નિર્ણય લેવો જોઈએ.હાઇકોર્ટે નવરાત્રી પહેલા જ આ નિયમ લાગુ કરવા જણાવ્યું છે.

ટ્રાફિક અંગેની જાહેરાતની અરજીની સુનાવણી દરમિયાન હાઇકોર્ટે સરકારને કહ્યું કે, ‘અગાઉ પણ આદેશ આપવામાં આવ્યા હતા છતાં પણ હજુ સુધી હેલ્મેટ ફરજિયાતના નિયમનો પાલન થતું નથી અને કોઈ હેલ્મેટ પહેરતું નથી દેખાતું. નવરાત્રિના દિવસો નજીક આવી રહ્યા છે એટલે એવા અહેવાલો આવશે કે આ તહેવારો દરમિયાન હેલ્મેટ પહેરવાના નિયમો હળવા બનાવવા જોઈએ. પરંતુ આ સમયે જ સૌથી મોટા અકસ્માતો થાય છે.’

હાઇકોર્ટે વધુમાં કહ્યું કે, ‘હેલ્મેટ પહેરવા અંગે જાગૃતિ ઝુંબેશ શરૂ કરવી જોઈએ અને જે કોઈ ત્રણ વખત હેલ્મેટ પહેર્યા વગર ઝડપાય તો તેનું લાઇસન્સ સસ્પેન્ડ કરવાની પણ સરકારે તૈયારી રાખવી જોઈએ. નહિતર આ કાનૂનનો કોઈ અમલ થશે નહીં. આજના લોકો દંડના રૂપિયા ભરવા તૈયાર થઈ જાય છે પરંતુ નિયમનો અમલ કરતા નથી. લોકો રોજેરોજ  નિયમનો દુરુપયોગ કરે છે, નિયમ ભંગ કરે છે. નવરાત્રિ પહેલા હેલ્મેટનું પાલન સખત રીતે થવું જોઈએ.

નોંધનીય છે કે, ગુજરાત હાઇકોર્ટે ટુ વ્હીલરમાં પાછળની સીટ પર બેસનાર માટે પણ હેલ્મેટ ફરજિયાત પહેરવાનો આદેશ આપ્યો હતો. પરંતુ હજુ સુધી તેનો અમલ થયો નથી.