મુંબઇમાં ફરી ભારે વરસાદ : ગ્રાન્ટ રોડ પર બિલ્ડીંગની બાલ્કની ધરાશાયી થતા મહિલાનું મોત

• મુંબઇમાં ફરી ભારે વરસાદ; ઠેર ઠેર તળાવ, જનજીવન અસ્તવ્યસ્ત
• ગ્રાન્ટ રોડ પર બિલ્ડિંગની બાલ્કની પડતાં 1 નું મોત , 3 ઘાયલ : હાઇ ટાઈડની ચેતવણી; 2 દિવસ અતિ ભારે વરસાદની હવામાન ખાતાની આગાહી

વોઇસ ઓફ ડે મુંબઈ

દેશના અનેક રાજ્યોમાં ભારે વરસાદ પડી રહ્યો છે. જેના પગલે કેટલાક વિસ્તારોમાં પૂર જેવી સ્થિતિનું નિર્માણ થયું છે. ત્યારે મહારાષ્ટ્રની રાજધાની મુંબઈમાં પણ શનિવારે સવારથી જ મુશળધાર વરસાદ વરસી રહ્યો હતો. ભારે વરસાદને પગલે અનેક વિસ્તાર પાણીમાં ગરકાવ થયા હતા. રસ્તાઓ પર વરસાદના પાણી ફરી વળતા વાહનવ્યવહાર ખોરવાઈ ગયો હતો. મુંબઈની લાઈફલાઈન ગણાતી લોકલ સેવા પર પણ અસર જોવા મળી હતી. શનિવારે ફરી જનજીવન અસ્તવ્યસ્ત થઈ ગયું હતું. દુર્ઘટનામાં 1 મહિલાનું મોત થયું હતું.

અનરાધાર વરસાદથી માયાનગરી મુંબઈ પાણી-પાણી થઈ ગયું હતું. શહેરમાં અનેક લોકોના ઘરોમાં પણ-પાણી ઘુસી ગયા હતા. વરસાદ વચ્ચે હવમાન વિભાગએ મુંબઈમાં આજે (21 જુલાઈ) મધ્યમથી ભારે વરસાદની સંભાવના વ્યક્ત કરી છે. મુંબઈ માટે આગામી બે દિવસ 21 અને 22 જુલાઈ ભારે વરસાદની શક્યતા છે. તેમજ રાત્રે લગભગ 9 વાગ્યે હાઈટાઈડની ચેતવણી પણ જાહેર કરવામાં આવી છે. દરિયાકાંઠે 10 ફૂટથી વધુ ઊંચા મોજાં ઉછળવાની અપેક્ષા છે. દરિયાકાંઠાના વિસ્તારોમાં પણ ચેતવણી આપવામાં આવી છે.

લો પ્રેશર

બંગાળની ખાડીનું લો પ્રેશર 21-22 જુલાઈ સુધીમાં ઘટવાની સંભાવના છે. જોકે, મુંબઈ અને આસપાસના વિસ્તારોમાં આગામી 4-5 દિવસમાં એટલે કે 25-26 જુલાઈ સુધી મધ્યમ વરસાદ ચાલુ રહેશે. ત્યારબાદ પણ વરસાદ સંપૂર્ણપણે બંધ થવાનો નથી. દેશની આર્થિક રાજધાની મુંબઈ જુલાઈમાં માસિક વરસાદનો મોટો રેકોર્ડ બનવા તરફ આગળ વધી રહી હોય તેવું લાગી રહ્યું છે.

બાલ્કની પડી ; 1 નું મોત

શનિવારે દક્ષિણ મુંબઈમાં ગ્રાન્ડ રોડ રેલ્વે સ્ટેશન નજીક ચાર માળની રહેણાંક ઇમારતની બાલ્કનીનો એક ભાગ ધરાશાયી થયો હતો. જેમાં એક મહિલાનું મોત થયું હતું જ્યારે અન્ય ત્રણ લોકો ઘાયલ થયા હતા. હવામાન વિભાગ એ જણાવ્યું હતું કે શનિવારે સવારે 8 વાગ્યા સુધી મુંબઈમાં છેલ્લા 24 કલાકમાં 91 મીમી વરસાદ નોંધાયો હતો, જ્યારે તેના પૂર્વ અને પશ્ચિમ ઉપનગરોમાં અનુક્રમે 87 મીમી અને 93 મીમી વરસાદ નોંધાયો હતો.