વડોદરા બોટ કાંડમાં નવેસરથી તપાસ કરવા હાઇકોર્ટનો આદેશ
સરકારનો રિપોર્ટ સ્વીકારવાનો ઇનકાર કરી અદાલતે કહ્યું પગલાં લઈને પરિણામ જણાવો
ગુજરાત હાઇકોર્ટે વડોદરા બોટ કાંડને લઇને સરકારનો રિપોર્ટ સ્વીકારવાનો ઇનકાર કર્યો છે. હાઇકોર્ટે કહ્યું કે શબ્દોની માયાજાળમાં સત્ય છૂપાવવાનો પ્રયાસ થઇ રહ્યો છે.
હાઇકોર્ટે કહ્યું હતું કે જવાબદાર અધિકારી જવાબદારીમાંથી છટકી શકે નહી. આ મામલામાં મ્યુનિસિપલ કમિશ્નરની જવાબદારી બનતી હોવાનો એડવોકેટ જનરલે કોર્ટમાં સ્વીકાર કર્યો હતો. એડવોકેટ જનરલે કહ્યું હતું કે જવાબદાર તમામ લોકો સામે ખાતાકીય તપાસ કરવા સરકાર તૈયાર છે.
હાઇકોર્ટે કહ્યું હતું કે શહેરી વિકાસ વિભાગે સોંપેલો રિપોર્ટ સંતોષકારક નથી. અમે વ્યક્તિગત રીતે કોઈની સામે નથી. જનહિતમાં જે જરૂરી છે તે પ્રકારના હુકમ કરવા જરૂરી છે. સુનાવણી દરમિયાન અમુક તબક્કે એડવોકેટ જનરલે કોર્ટની માફી માંગી હતી. હાઇકોર્ટે આખી ઘટનાની નવેસરથી તપાસ કરવાના નિર્દેશ આપ્યા હતા. હાઇકોર્ટે કહ્યું હતું કે ખાતાકીય અને શિસ્ત ભંગના પગલા લઈ પરિણામ જણાવો.
એક તબક્કે કોર્ટે નોંધ્યું હતું કે તમામ ઓરિજનલ રેકોર્ડ જોયા બાદ કોર્ટ જાતે જ ઓર્ડર પાસ કરશે. જવાબદાર પદ પર બેઠેલા લોકો પોતાનું કામ યોગ્ય રીતે ન કરે એ ચલાવી લેવાશે નહીં. જવાબદાર અધિકારી પોતાની જવાબદારીમાંથી છટકી શકે નહીં. એડવોકેટ જનરલે કહ્યું હતું કે આવી દુર્ઘટનાઓમાં સરકાર કોઈપણને છોડવા માંગતી નથી. આખી ઘટનાની નવેસરથી તમામ રેકોર્ડની જોયા બાદ તપાસ કરી ખાતાકીય અને શિસ્ત ભંગના પગલાં લઈ કોર્ટને પરિણામ જણાવવા કોર્ટે સરકારને નિર્દેશ આપ્યા હતા.