ગુજરાતના MSME માટે ખુલશે વૈશ્વિક બજાર: MSME અને નાના કારીગરો માટે વૈશ્વિક તકોનો રોડમેપ તૈયાર
વિકસિત ગુજરાતથી વિકસિત ભારતના સંકલ્પને સાકાર કરવા માટે મુખ્યમંત્રી ભૂપેન્દ્ર પટેલનું નેતૃત્વ સતત વૈશ્વિક મંચ પર ગુજરાતની ઉપસ્થિતિ મજબૂત કરી રહ્યું છે. અમેરિકા અને કેનેડાના સાપ્તાહિક પ્રવાસના ચોથા દિવસે સાન ફ્રાન્સિસ્કોની સફળ મુલાકાત બાદ મુખ્યમંત્રી વોશિંગટન ડી.સી. પહોંચ્યા હતા. અહીં તેમણે વૈશ્વિક રિટેલ દિગ્ગજ વોલમાર્ટના ઉચ્ચ અધિકારીઓ સાથે મહત્વપૂર્ણ બેઠક યોજી હતી. આ બેઠકનો મુખ્ય ઉદ્દેશ્ય ગુજરાતના અસંખ્ય નાના ઉદ્યોગો અને કારીગરોને આંતરરાષ્ટ્રીય બજાર પૂરું પાડવાનો છે, જે આવનારી વાયબ્રન્ટ સમિટ-૨૦૨૭ માટે એક સીમાચિહ્ન રૂપ સાબિત થશે.
વોલમાર્ટના એક્ઝિક્યુટીવ વાઈસ પ્રેસિડેન્ટ સાથે વન-ટુ-વન બેઠક
વોશિંગટન ડી.સી. ખાતે મુખ્યમંત્રી ભૂપેન્દ્ર પટેલે વોલમાર્ટના ગ્લોબલ પબ્લિક પોલિસી એન્ડ ગવર્નમેન્ટ અફેર્સના એક્ઝિક્યુટીવ વાઈસ પ્રેસિડેન્ટ યુત ડેન બ્રાયન્ટ સાથે સઘન મંત્રણા કરી હતી. આ બેઠકમાં ગુજરાતના વિશાળ એમ.એસ.એમ.ઈ. (MSME) ક્ષેત્રને સક્ષમ બનાવવા અને તેની ગુણવત્તામાં સુધારો કરીને વૈશ્વિક સ્તરે નિકાસ વધારવા અંગે સવિસ્તર ચર્ચા થઈ હતી. વોલમાર્ટના અધિકારીએ માહિતી આપી હતી કે તેમની કંપની દ્વારા ‘વૃદ્ધિ’ કાર્યક્રમ અંતર્ગત વર્ષ ૨૦૧૯થી અત્યાર સુધીમાં ૧.૧૫ લાખથી વધુ MSMEને તાલીમ આપવામાં આવી છે, તેમજ ૨૦૨૮ સુધીમાં ૧.૭૦ લાખ એકમોને તાલીમબદ્ધ કરવાનો લક્ષ્યાંક રાખવામાં આવ્યો છે.
વાયબ્રન્ટ સમિટ-૨૦૨૭ માટે સ્પષ્ટ રોડમેપ તૈયાર કરવાની દિશા
મુખ્યમંત્રી ભૂપેન્દ્ર પટેલે રાજ્ય સરકારના સંબંધિત વિભાગો અને વોલમાર્ટ સંયુક્તપણે વર્કશોપનું આયોજન કરે તેવી હિમાયત કરી હતી, જેથી એમ.એસ.એમ.ઈ. સેક્ટરની ક્ષમતાઓને યોગ્ય દિશા મળી શકે. આગામી ૩ થી ૪ મહિનાની અંદર આ નાના કારીગરો અને ઉદ્યોગો વૈશ્વિક બજાર સુધી પહોંચી શકે તે માટે પરસ્પર સંકલન સાથે કામ કરવા પર સહમતિ સાધવામાં આવી હતી. ખાસ કરીને, આગામી વાયબ્રન્ટ સમિટ-૨૦૨૭ દરમિયાન આ સમગ્ર આયોજનનો એક સ્પષ્ટ અને પરિણામલક્ષી રોડમેપ જાહેર કરવા માટે ઉચ્ચસ્તરીય મંત્રણાઓ ફળદાયી રહી હતી.
ઉચ્ચસ્તરીય પ્રતિનિધિ મંડળની ઉપસ્થિતિ
આ મહત્વપૂર્ણ બેઠકમાં ગુજરાતના વિકાસ અને વૈશ્વિક ભાગીદારીને વેગ આપવા માટે રાજ્યના ઉચ્ચ અધિકારીઓ પણ મુખ્યમંત્રીની સાથે ઉપસ્થિત રહ્યા હતા. જેમાં મુખ્ય સચિવ એમ.કે. દાસ, નાણાં વિભાગના અધિક મુખ્ય સચિવ ટી. નટરાજન, ઉદ્યોગ વિભાગના અધિક મુખ્ય સચિવ મતી મમતા વર્મા તથા મુખ્યમંત્રીના અગ્ર સચિવ સંજીવ કુમાર સહિતના મહાનુભાવોએ ચર્ચાઓમાં સક્રિય યોગદાન આપ્યું હતું.
મુખ્યમંત્રી ભૂપેન્દ્ર પટેલની આ વન-ટુ-વન બેઠક ગુજરાતના લોકલ ઇકોસિસ્ટમને ગ્લોબલ સ્તરે લઈ જવામાં અત્યંત સીમાચિહ્નરૂપ સાબિત થશે. વોલમાર્ટ જેવા વૈશ્વિક પ્લેટફોર્મ સાથેના આ સહયોગથી રાજ્યના નાના કારીગરો અને એમ.એસ.એમ.ઈ. ઉદ્યોગો માટે નિકાસના નવા દ્વાર ખુલશે, જે ‘આત્મનિર્ભર ગુજરાત’ અને ‘વિકસિત ગુજરાત’ના સ્વપ્નને વધુ મજબૂતી પૂરી પાડશે.
