ઓક્ટોબરમાં ભર ચોમાસાનો અનુભવ: 44% વધુ વરસાદ, 20 વર્ષ જુનો રેકોર્ડ તુટ્યો, 20 રાજ્યોમાં અનરાધાર
દેશમાંથી ચોમાસાએ વિદાય લઈ લીધા પછી ઓક્ટોબર માસમાં 20 વર્ષમાં બીજી વાર રેકોર્ડ તોડ્યો છે. હવામાન વિભાગના જણાવ્યા અનુસાર, પાછલા 20 વર્ષમાં ઓક્ટોબર મહિનામાં વરસાદની સરેરાશ 74 મીમી રહી છે. પરંતુ આ વરસે ઓક્ટોબરમાં 106 મીમી એટલે કે 44 ટકા વધુ વરસાદ પડ્યો છે. ઓક્ટોબરમાં કેન્દ્ર શાસિત પ્રદેશ સહીત 20 રાજ્યોમાં વધુ વરસાદ થયો છે. આ પહેલા 2019માં ઓક્ટોબરમાં 109 મીમી એટલે કે 47 ટકા વધુ વરસાદ નોંધાયો હતો.
આ વખતે બંગાળની ખાડી અને અરબી સમુદ્રમાં વારંવાર હવાનું નીચું દબાણ સર્જાવાને લીધે કાંઠાના રાજ્યો સહિત મધ્ય ભારત, ઉત્તર-પશ્ચિમ ભારત અને દક્ષિણ ભારતના વિસ્તારોમાં અનરાધાર વરસાદ પડ્યો છે. ચક્રવાત મોથાને લીધે કાંઠાના રાજ્યોમાં પૂર જેવી સ્થિતિ ઉભી થઇ હતી. આ વરસાદની અસર હવે ઠંડીની સીઝન ઉપર પણ પડશે.
રવિ પાકને થશે ફાયદો
ચોમાસા પછી વરસાદ ચાલુ રહેવાને લીધે કેટલાંક રાજ્યોમાં રવિ પાકની વાવણી મોડી થઇ છે. દેશમાં 637 લાખ હેકટરમાં રવિ પાકની વાવણી થાય છે. તેમાંથી 27 ઓક્ટોબર સુધીમાં 27.46 લાખ હેક્ટરમાં જ વાવણી થઇ શકી છે. જ્યાં વાવણી થઇ ગઈ છે ત્યાં વધુ વરસાદને લીધે નુકસાનની ભીતિ છે. પરંતુ જ્યાં વાવણી બાકી છે ત્યાં આવનારા દિવસોમાં વાવણી થવાની હોવાથી પાકને મોટો ફાયદો થઇ શકે છે.
