LRDની પરીક્ષામાં નાપાસ થવાના ડરે યુવતી નીકળી આપઘાત કરવા : અભયમ્ની ટીમે સમયસર પહોંચી જીવન બચાવ્યું
તાજેતરમાં જ લોકરક્ષક દળ (LRD)ની પરીક્ષા લેવામાં આવી હતી જેમાં લાખો પરીક્ષાર્થીઓએ ભાગ લીધો હતો. આ પરીક્ષાનું પરિણામ હજુ આવવાનું બાકી છે ત્યાં જ રાજકોટની યુવતીએ હાર માની લઈ આપઘાત કરી લેવા માટે નીકળી જતાં અભયમ્ ટીમે સમયસર પહોંચી જઈને યુવતીને આપઘાત કરતા અટકાવી હતી સાથે સાથે તેનું કાઉન્સેલિંગ પણ કર્યું હતું.
આ અંગે જાણવા મળ્યા પ્રમાણે 15 જૂને 181 મહિલા હેલ્પલાઈન પર એક વ્યક્તિનો ફોન આવ્યો હતો. ફોન પર એ વ્યક્તિએ જણાવ્યું કે એક યુવતીને તેના ઘરનું સરનામું યાદ નથી અને તે ખૂબ જ દુઃખી છે. આ અંગેનો ફોન આવતાં જ અભયમ્ ટીમના કાઉન્સીલર બીનાબેન ગોહિલ, કોન્સ્ટેબલ રોજીબેન બાનુ અને પાયલટ વિજયભાઈ સ્થળ પર પહોંચી ગયા હતા. ત્યારબાદ આ યુવતી રસ્તામાં ધ્રુજતી મળી આવી હતી. તેને નામ-સરનામું પૂછવામાં આવ્યું તો પણ તેણે યાદ નથી તેવો જવાબ આપ્યો હતો.
આ પણ વાંચો : ઇન્કમટેક્સની નવી ગાઈડલાઈન : જો IT રિટર્નની વિગતો મેચ નહીં થાય તો ફટકારશે નોટિસ, આ બાબતોની થશે તપાસ
અભયમ્ ટીમે યુવતીને આશ્વાસન આપી વાતચીત કરતાં યુવતીએ કહ્યું કે તેણે એલઆરડીની પરીક્ષા આપી હતી પરંતુ 50 માર્કસના પ્રશ્નોના જવાબ લખવાના બાકી રહી ગયા હતા એટલે નાપાસ થશે તો પરિવારજનો ફરીથી કોઈ પરીક્ષા આપવા દેશે નહીં અને અન્ય લોકો પણ ટોણા મારશે એટલા માટે જ તે આજીડેમ અથવા દરિયામાં કૂદીને આત્મહત્યા કરવા નીકળી હતી. આ પછી ટીમે તેને સમજાવ્યું કે હજુ તો પરિણામ આવ્યું નથી અને આગામી દિવસોમાં પણ પરીક્ષા લેવામાં આવશે.
આમ છતાં યુવતી આત્મહત્યા કરવા માટે આજીડેમ લઈ જવાની જિદ્દ કરતા આખરે સ્થાનિક પોલીસની મદદ લેવામાં આવી હતી. હાલ સ્થાનિક પોલીસ દ્વારા યુવતીનું કાઉન્સેલિંગ કરવામાં આવી રહ્યું છે.
