રાજ્યના ઇન્ચાર્જ DGP બન્યા ડૉ.રાવ: છ માસ એક્સટેન્શન મેળવનાર વિકાસ સહાયને અપાઇ નિવૃત્તિ વિદાય

રાજ્યના નવા પોલીસવડા કોણ? તેનો છેલ્લા એક સપ્તાહથી પોલીસ ડિપાર્ટમેન્ટમાં ભારે કુતુહલ સાથે મુદ્દો ચર્ચાતો હતો. અંતે આજે ગુજરાત રાજ્યના કાયમી નહીં પરંતુ ઇનચાર્જ પોલીસવડા તરીકે સિનિયર IPS ડો. કે.એલ.એન રાવ મળ્યા છે. DGP વિકાસ સહાયની ફરજનો આજે આખરી દિવસ હતો અને ગાંધીનગર પોલીસ ભવનમાં પૂરો દિવસ ઉત્તેજના ચાલી હતી. ડો. રાવ DGP તરીકે ફાઇનલ હોવાની વાતો હતી. સમીસાંજે વિકાસ સહાયને ફરજનિવૃત્ત જાહેર કરાયા હતા અને ઇનચાર્જ DGP તરીકે સીઆઇડી ક્રાઇમ અને રેલવેના DGP ડો. રાવનું નામ જાહેર કરવામાં આવ્યું હતું.

રાજ્યના DGP વિકાસ સહાય 31 ડિસેમ્બરને બુધવારના રોજ નિવૃત્ત થયા તે પૂર્વે તેમને છ માસ પહેલા 30 જૂનના રોજ DGP તરીકે એક્સટેન્શન મળ્યું હતું. તેમનો આ પિરિયડ પૂર્ણ થવાને આરે હતો. કલાકોની વાર હતી ત્યાં સુધી નવા DGPનું કોઇ નામ જાહેર થયું ન હતું. જેથી અધિકારીઓમાં એક તબક્કે એવો પણ ગણગણાટ હતો કે કદાચ અગાઉના DGP ભાટિયાની માફક વધુ એક વખત સહાયને એક્સટેન્શન પણ મળી શકે. આજે ગાંધીનગર પોલીસ ભવન ખાતે DGP વિકાસ સહાયને નિવૃત્તિ વિદાયમાન આપવા માટેની નિયમબદ્ધ બધી તૈયારીઓ સવારથી જ થઇ ચૂકી હતી.

આ પણ વાંચો :Rule Change 1st January: નવા વર્ષના પ્રથમ જ દિવસે મોંઘવારીનો ફટકો!  LPG થી લઈને કાર સુધી આ 7 મોટા ફેરફાર, તમારા ખિસ્સા પર થશે અસર!

રાજ્યના ઇન્ચાર્જ DGP બન્યા ડૉ.રાવ

નવા DGP તરીકે બે સિનિયર IPS ઓફિસર ડો. કે.એલ.એન. રાવ અને અમદાવાદના પોલીસ કમિશનર જી.એસ. મલિકના નામ ટોપ પર હતા. આ બન્ને નામમાં ડો. રાવ અગે્રસર ગણાતા હતા. આજે સમીસાંજે વિકાસ સહાયને સેવાનિવૃત્ત જાહેર કરાયાની સાથે ઇનચાર્જ DGP તરીકે 1992ની બેચના IPS ઓફિસર ડો. કે. લક્ષ્મીનારાયણ રાવને રાજ્ય સરકાર દ્વારા સત્તાવાર જાહેરાત કરાઇ હતી.

તેલંગાણાના વતની ઇનચાર્જ DGP ડો. રાવ એમએસસી પીએચડીનો અભ્યાસ ધરાવે છે. 26-10-1967ના રોજ જન્મેલા ડો. રાવ 1992માં ગુજરાતના IPS ઓફિસર તરીકે મૂકાયા હતા. તેઓ રાજકોટમાં ડીસીપી તેમજ જેસીપી તરીકે ફરજ બજાવી ચૂક્યા છે. આ ઉપરાંત રાજ્યમાં એસપી તરીકે મહેસાણા, હિંમતનગર, ખેડા સહિતના સ્થળોએ ફરજ બજાવી છે. તેઓ 22 મહિના બાદ ઓક્ટોબર-2027માં નિવૃત્ત થશે. હાલ માત્ર DGPનો ચાર્જ સોંપવામાં આવતાં IPS લોબીથી લઇ પોલીસ કર્મચારીઓમાં આગામી સમયમાં કોઇ નવા ફેરફારો આવશે કે કેમ? તેવી ચર્ચાઓ આરંભાઇ છે.