દ્વારકામાં દે ધનાધન…. 6 કલાકમાં સાંબેલાધારે 6 ઈંચ વરસાદ, વેરાવળમાં 4 ઈંચ વરસાદ
હાલારના જામનગર અને દેવભૂમિ દ્વારકા જીલ્લામાં મેઘરાજા મન મુકીને વરસી રહ્યા છે. દ્વારકા જીલ્લામાં મેઘરાજાનું રૌદ્ર સ્વરૂપ જોવા મળી રહ્યું છે. દેવભૂમિ દ્વારકા જીલ્લામાં છેલ્લા 2 દિવસથી મેઘરાજા ધોધમાર વરસી રહ્યા છે ત્યારે આજે સવારથી દ્વારકામાં મેઘમહેર યથાવત છે. દ્વારકામાં 6 કલાકમાં સાંબેલાધારે વધુ 6 ઈંચ વરસાદ વરસતા ભારે હાલાકીનો સામનો કરવો પડી રહ્યો છે.
ગુજરાતમાં શુક્રવારના રોજ કુલ 122 તાલુકામાં વરસાદ ખાબક્યો હતો. ત્યારે આજે સવારે 6 થી ૧૨ વાગ્યા દરમિયાન સાંબેલાધારે 6 ઈંચ વરસાદ નોંધાયો તેમજ વેરાવળમાં ધોધમાર 4 ઈંચ વરસાદ નોધાયો હતો તલાલા અને પાટણ-વેરાવળમાં 86મીમી , વંથલી, જુનાગઢ અને જુનાગઢ શહેરમાં સવા 2 ઈંચ વરસાદ નોંધાયો છે. માણાવદરમાં એક ઈંચ, ઉપલેટા અને ઉમરગાંવમાં 15 મીમી અને ભેસાણમાં 13 મીમી વરસાદ વરસ્યો છે. આ સાથે જ અન્ય 35 તાલુકામાં સામાન્યથી 10 મીમી જેટલો વરસાદ ખાબક્યો છે.
હવામાનને લઇ અંબાલાલ પટેલની આગાહી
રાજ્યના હવામાનને લઇ અંબાલાલ પટેલની આગાહી છે. બંગાળના ઉપસાગરમાં સિસ્ટમ સક્રિય થતા ભારે વરસાદ આવશે. 24 જુલાઇ સુધી દક્ષિણ ગુજરાતમાં ભારેથી અતિભારેની આાગાહી છે. જૂનાગઢના ભાગોમાં 7 ઇંચથી વધુ વરસાદ થવાની શક્યતા છે. જામનગરના ભાગોમાં 5 ઇંચ જેટલો વરસાદ થવાની આગાહી છે. ઉત્તર સૌરાષ્ટ્રના ભાગોમાં પણ ભારે વરસાદ થઇ શકે. રાજ્યના વરસાદથી વંચિત વિસ્તારોમાં પણ વરસાદ પડશે. પંચમહાલ, સાબરકાંઠા અને કચ્છના ભાગોમાં ભારેની આગાહી છે. 26 અને 30 જુલાઇએ બંગાળના ઉપસાગરમાં સિસ્ટમ બનશે. ઓગસ્ટ મહિનામાં રાજ્યના વિવિધ ભાગોમાં વરસાદ થશે.
