રાજકોટમાં કોરોના ઈઝ બેક?! 6 મહિનાના બાળકનો રિપોર્ટ પોઝિટિવ, 10 દિવસમાં નોંધાયા 12 કેસ

ફિલ્મ ગબ્બર ઇઝ બેકની જેમ રાજકોટમાં કોરોના ઇઝ બેકની સ્થિતિ નિર્માણ થઇ છે. સમગ્ર દેશમાં કોરોના મહામારીએ ફરી માથું ઉચક્યું હોવાની સ્થિતિમાં દેશમાં કોરોનાના 1200 કેસ નોંધાઈ ચૂક્યા છે જેમાં અત્યાર સુધી 12ના મોત નિપજ્યાં છે. જેમાં એક્ટિવ કેસની સંખ્યા 1083 છે. ત્યારે જો વાત રાજકોટની કરવામાં આવે તો રાજકોટમાં કોરોનાના કેસમાં ઉછાળો આવ્યો છે. શહેરમાં 10 દિવસમાં 12 કેસ નોંધાયા છે.

મળતી માહિતી અનુસાર, રાજકોટ શહેરમાં આવેલા રામપાર્કની 25 વર્ષીય મહિલા, સદગુરુનગરમાં 32 વર્ષીય પુરુષ, બસ સ્ટેશન પાસે 26 વર્ષીય પુરુષ, જીવરાજપાર્કમાં 67 વર્ષીય પુરુષ, સદગુરુનગરમાં 6 મહિનાનું બાળક અને મંગલ પાર્કમાં 26 વર્ષીય પુરુષ અને 16 વર્ષીય તરુણ જે વિમલનગરમાં રહે છે તેનો રિપોર્ટ પોઝીટીવ આવ્યો છે. તમામ દર્દીઓ હાલ હોમ આઈસોલેશનમાં છે. અને બધાની તબિયત સ્થિર છે. આજ દિવસ સુધીમાં રાજકોટમાં કુલ 12 કેસ સામે આવી ચુક્યા છે. જેમાં 1 દર્દી સંપૂર્ણપણે તંદુરસ્ત થયા છે. જ્યારે 11 દર્દીઓ હાલ સારવાર હેઠળ છે.

તા.19થી 25 સુધીમાં રાજકોટ શહેરમાં ચાર કેસ સામે આવ્યા બાદ રાજકોટમાં કોરોનાના વધુ બે કેસ સામે આવ્યા છે. જેમાં મારવાડી કોલેજના એક કર્મચારી ફોરેનથી પરત આવ્યા આવ્યા બાદ કોરોના પોઝેટીવ આવતા હોમ આઇસોલેટ કરવામાં આવ્યા છે જયારે બીજો કેસ એરપોર્ટ રોડ ઉપર શિવાજી પાર્કમાં સામે આવ્યો છે જેમાં લોકલ હિસ્ટ્રી ધરાવતા મહિલા કોરોના સંક્રમિત બનતા હોમ આઇસોલેટ કરવામાં આવ્યા છે. એકંદરે છેલ્લા 10 દિવસમાં રાજકોટમાં કોરોનાના નવા 12 કેસ નોંધાયા છે.

JN.1 કેટલો ખતરનાક?

જેએન.1માં લગભગ 30 પરિવર્તનો જોવા મળ્યા છે અને તે જૂના વેરિયન્ટ્સો કરતાં વધુ ચેપી હોવાનું કહેવાય છે. જો કે, નિષ્ણાતો માને છે કે મોટાભાગના લોકોને રસી અને ચેપથી અમુક સ્તરનું રક્ષણ મળે છે, તેથી ગંભીરતાની શક્યતા ઓછી છે.

JN.1 વેરિયન્ટના લક્ષણો

માથાનો દુખાવો

સુકી ઉધરસ

હળવો તાવ

ગળામાં દુખાવો

શરીરમાં દુખાવો

ક્યારેક ઝાડા કે ઉલટી