રાજકોટ : કોંગ્રેસ ગાયબ’, ભાજપે કરાવ્યો ટાઈમપાસ’: જનરલ બોર્ડ બન્યું ફારસ’
કંટાળાજનક પ્રશ્નનો જવાબ કમિશનરે આપ્યો ત્યારે કોર્પોરેટરો પણ ખાઈ રહ્યા’તા બગાસા !
મ્યુ.કમિશનરે ૧૧થી ૧૨ વાગ્યા સુધી બોલ્યે રાખ્યું, નગરસેવકો વિદ્યાર્થીઓની જેમ સાંભળતાં રહ્યા, અમુક મોબાઈલમાં તો અમુક વાતોમાં વ્યસ્ત પેટા: કોંગ્રેસે પ્રશ્નો તો પૂછયા, બોર્ડમાં હાજર રહેવાનું ટાળ્યું: ભાજપના ૧૦ કોર્પોરેટરો ગેરહાજર
રાજકોટ મહાપાલિકામાં દર બે મહિને થતી જનરલ બોર્ડની કાર્યવાહી દિવસેને દિવસે કંટાળાજનક બની રહી હોય તેવી રીતે હવે કોઈને તેમાં રસ ન રહ્યાનું સ્પષ્ટપણે લાગી રહ્યું છે. ખાસ કરીને શનિવારે મળેલા જનરલ બોર્ડમાં કોંગ્રેસગાયબ’ થઈ જતાં ભાજપને ભાવતું મળી ગયું હતું. પ્રશ્નોત્તરીમાં પ્રથમ પ્રશ્ન ભાજપના કોર્પોરેટરનો હોય તેનો જવાબ મ્યુ.કમિશનરે એક કલાક સુધી આપ્યે રાખતાં ખુદ ભાજપના કોર્પોરેટરો બગાસા ખાઈ રહેલા જોવા મળ્યા હતા. એકંદરે ભાજપ દ્વારા તેના જ નગરસેવકોને ટાઈમપાસ' કરાવ્યો હોવાનું દેખાઈ આવ્યું હતું. જનરલ બોર્ડમાં ભાજપના ૧૦ તેમજ કોંગ્રેસના ૪ મળી ૧૪ કોર્પોરેટરો ગેરહાજર રહ્યા હતા. પ્રથમ પ્રશ્ન કોર્પોરેટર હાર્દિક ગોહેલનો હતો જેમાં તેમણે શહેરમાં બે વર્ષમાં મહાપાલિકા દ્વારા ડે્રનેજ, વોટર વર્કસ, રોશની સહિતની શાખાઓ દ્વારા શું શું કામગીરી કરાઈ તેનો વોર્ડવાઈઝહિસાબ’ માંગ્યો હતો. મ્યુ.કમિશનર તુષાર સુમેરા દ્વારા આ પ્રશ્નનો જવાબ આપવાનું ૧૧ વાગ્યાથી શરૂ કરાયા બાદ ૧૨ વાગ્યા સુધી આ જ પ્રશ્નના જવાબ આપ્યે રાખ્યા હતા. અંતે બોર્ડ પૂર્ણ થવાની ઘડી નજીક આવી એટલે કોર્પોરેટર હાર્દિક ગોહિલ દ્વારા તેમણે પૂછેલા પ્રશ્નનો જવાબ લેખિતમાં આપવા માંગણી કરી હતી. આ સાથે જ બોર્ડ પૂર્ણ જાહેર કરવામાં આવ્યું હતું.
એકંદરે એક કલાક સુધી મ્યુ.કમિશનર શિક્ષકની જેમ બોલતાં રહ્યા હતા અને નગરસેવકો વિદ્યાર્થીઓની જેમ સાંભળતાં રહ્યા હતા. આ એક કલાકની કામગીરી દરમિયાન અમુક નગરસેવકો મોબાઈલમાં તો અમુક વાતોમાં વ્યસ્ત જોવા મળ્યા હતા. વળી, અમુક અમુક તો થોડી થોડીવાર માટે પગ મોકળા કરવા માટે પણ બહાર નીકળતાં દેખાયા હતા !
બોર્ડની આ કાર્યવાહીમાં કોંગ્રેસ દ્વારા છ પ્રશ્નો પૂછવામાં આવ્યા હતા પરંતુ કાર્યવાહીમાં હાજર રહેવાનું ટાળ્યું હતું. એકંદરે બોર્ડ પૂર્ણ થયા બાદ એજન્ડામાં રહેલી તમામ ૯ દરખાસ્ત સર્વાનુમત્તે મંજૂર કરવામાં આવી હતી.
