અમદાવાદમાં SG હાઇવે પર જળબંબાકાર વચ્ચે પેલેડિયમ મોલ પાસે CMનો કાફલો ફસાયો, પોલીસે બંધ કટ ખોલી રસ્તો કરાવ્યો
અમદાવાદ: મેઘરાજાની તોફાની બેટિંગના કારણે આજે બોપલ, વસ્ત્રાપુર, પ્રહલાદ નગર અને થલતેજ સહિત સમગ્ર અમદાવાદ શહેરમાં જળબંબાકારની સ્થિતિ સર્જાઈ છે. ધોધમાર અવિરત વરસાદને પગલે શહેરના તમામ મુખ્ય માર્ગો નદીમાં ફેરવાઈ ગયા છે અને વાહનવ્યવહાર સંપૂર્ણપણે ખોરવાઈ ગયો છે. શહેરની ‘લાઈફલાઈન’ ગણાતા એસજી હાઇવે પર ભરાયેલા કમરબૂડ પાણી અને ટ્રાફિકના ચક્કાજામ વચ્ચે રાજ્યના મુખ્યમંત્રી (CM)નો કાફલો પણ અટવાઈ જતાં તંત્રમાં દોડધામ મચી ગઈ હતી.
અતિભારે વરસાદથી એસજી હાઇવે સ્વિમિંગ પૂલ બન્યો
પશ્ચિમ અમદાવાદના પોશ વિસ્તારોમાં માત્ર કલાકોમાં ખાબકેલા ભારે વરસાદના કારણે માર્ગો પરથી પાણીનો નિકાલ થવો અશક્ય બની ગયો હતો. જેને પગલે એસજી હાઇવે પર પકવાન ચાર રસ્તા, થલતેજ અંડરબ્રિજ અને પેલેડિયમ મોલ આસપાસ ગોઠણસમા પાણી ભરાઈ ગયા હતા. રોડ પર પાણી હોવાથી વાહનોની ગતિ સાવ ધીમી પડી ગઈ હતી અને કિલોમીટરો સુધી વાહનોની લાંબી લાઈનો લાગી હતી.
પેલેડિયમ મોલ નજીક CMનો કાફલો ચક્કાજામમાં અટવાયો
મળતી માહિતી મુજબ, મુખ્યમંત્રીશ્રીનો સિક્યુરિટી કોન્વોય પેલેડિયમ મોલ નજીકથી પસાર થઈ રહ્યો હતો ત્યારે જ અનરાધાર વરસાદી પાણી વચ્ચે આખો કાફલો ભારે ટ્રાફિકમાં ફસાઈ ગયો હતો. આગળ-પાછળ સામાન્ય નાગરિકોના વાહનો થંભી ગયા હોવાથી VIP કાફલા માટે આગળ વધવું તદ્દન અશક્ય બની ગયું હતું.
સ્થળ પરથી ઇમરજન્સી એક્શન:
વીઆઈપી કોન્વોય અટવાયો હોવાની જાણ થતાં જ પાયલોટિંગ સિક્યુરિટી અને સ્થળ પર તૈનાત ટ્રાફિક પોલીસ તાત્કાલિક હરકતમાં આવી હતી. આગળ જગ્યા ન હોવાથી પોલીસે સમયસૂચકતા વાપરી પેલેડિયમ મોલ પાસે આવેલો બંધ કટ (રોડ ડિવાઇડર) ઈમરજન્સી ધોરણે ખોલી નાખ્યો હતો. આ કટમાંથી કાફલાને સુરક્ષિત રીતે ડાયવર્ટ કરીને રવાના કરવામાં આવ્યો હતો.
મુખ્ય પોઈન્ટ્સ પર પોલીસનો કાફલો ખડકી દેવાયો
હાલમાં પણ એસજી હાઇવે પર પરિસ્થિતિ ગંભીર બનેલી છે. વાહનચાલકોની સુરક્ષા અને ટ્રાફિકનું નિયમન જાળવી રાખવા માટે પોલીસે પકવાન ચાર રસ્તા, થલતેજ અને પેલેડિયમ મોલ પાસે વધારાની ટીમ તૈનાત કરી દીધી છે. તંત્ર દ્વારા નાગરિકોને કામ વગર ઘરની બહાર ન નીકળવા અને એસજી હાઇવે તરફનો પ્રવાસ ટાળવા અપીલ કરવામાં આવી રહી છે.
