મુખ્યમંત્રીના કાર્યક્રમમાં ફેરફાર: ભૂપેન્દ્ર પટેલ બુધવારે નહીં, શનિવારે આવશે રાજકોટ, કરોડોના વિકાસકાર્યોનું કરશે લોકાર્પણ-ખાતમુહૂર્ત
આવતીકાલે બુધવારે રાજકોટ મહાપાલિકાનો સ્થાપના દિવસ છે ત્યારે તંત્ર દ્વારા બોલિવૂડ ગીતકાર જોડી સચેત-પરંપરા ટંડનની મ્યુઝિકલ નાઈટનું આયોજન કરવામાં આવ્યું છે. દરમિયાન તંત્ર દ્વારા ગત 12 નવેમ્બરે એવી જાહેરાત કરવામાં આવી હતી કે સ્થાપના દિવસ નિમિત્તે મુખ્યમંત્રી ભૂપેન્દ્રભાઈ પટેલ રાજકોટમાં ઉપસ્થિત રહેશે અને અહીં 550 કરોડથી વધુના વિકાસકાર્યોનું લોકાર્પણ તેમજ ખાતમુહૂર્ત કરશે. જો કે હવે કાર્યક્રમમાં ફેરફાર થયો હોવાનું સામે આવ્યું છે અને મુખ્યમંત્રી બુધવારે નહીં પરંતુ શનિવારે રાજકોટ આવનાર હોવાનું જાણવા મળ્યું હતું.
મુખ્યમંત્રી ભૂપેન્દ્રભાઈ પટેલ હાલ એકતા યાત્રામાં વ્યસ્ત હોવાને કારણે કાર્યક્રમ બે દિવસ પાછો ઠેલાયો છે. અગાઉના કાર્યક્રમમાં મુખ્યમંત્રી સાંજે 5ઃ30 વાગ્યે રાજકોટ આવી જવાના હતા પરંતુ હવે શનિવારે સવારના સમયે રાજકોટ આવશે તેવું જણાવાયું છે.
એકંદરે મુખ્યમંત્રીનો રાજકોટનો કાર્યક્રમ યથાવત રાખવામાં આવ્યો છે પરંતુ તારીખ અને સમયમાં ફેરફાર કરાયો છે. અહીં તેઓ વેસ્ટ ઝોનમાં નાણાંવટી ચોક નજીક સંતોષ પાર્ક મેઈન રોડ પર બનેલા આધુનિક કોમ્યુનિટી હોલનું લોકાર્પણ કરશે સાથે સાથે આવાસ યોજનાનો ડ્રો પણ તેમના હસ્તે જ કરવામાં આવશે. આ સહિતના કાર્યક્રમો મુખ્યમંત્રીની ઉપસ્થિતિમાં યોજાશે પરંતુ હવે તારીખમાં ફેરફાર થયો છે. જો કે સત્તાવાર તારીખ હજુ સુધી મુખ્યમંત્રી કાર્યાલય તરફથી આપવામાં આવી ન હોવાનું કમિશનર બ્રાન્ચના વર્તુળોએ જણાવ્યું હતું.
