લાંચ લેતા પકડાયેલા સી-જીએસટી ઈન્સ્પેક્ટર ક્લાસ-ટુ ઓફિસર ધર્મેન્દ્ર યાદવ (ઉ.વ.30) અન્ય રાજ્યના વતની છે. સ્ટાફ સિલેક્શનમાં અઢી વર્ષ પહેલાં 2023માં ડાયરેક્ટ સિલેક્ટ થયો હતો. પ્રથમ પોસ્ટિંગ રાજકોટ ખાતે થયું હતું. હજુ તો નોકરીને બે-અઢી વર્ષ જેવો સમય થયો અને કેન્દ્રીય કર્મચારી હોવાથી પગાર પણ સારો હોવા છતાં નોકરીના સ્ટાર્ટઅપમાં જ લાંચ લેવાનું સ્ટાર્ટ કરી દીધું હોવાની ભારે ચર્ચા સાથે ચકચાર જાગી છે. એસીબીએ આરોપીએ અગાઉ આવી રીતે કોઈ કેસ, તપાસમાં કટકટાવ્યા છે કે નહીં ? સહિતના મુદ્દે તપાસ હાથ ધરી છે. આરોપીના ઘરનું સર્ચ સાથે બેન્ક ખાતા સહિતની તપાસ કરાશે.
છ આંકડાનો પગાર હોય કે સાત આંકડામાં પણ કટકટાવવાની ટેવ (કૂટેવ) પડી હોય એ નાની રકમમાં પણ મોં નાખ્યા વિના રહે નહીં. રાજકોટમાં આવા જ એક ખિસ્સાભરૂ (લાંચ લેતા) સી-જીએસટીના ઈન્સ્પેક્ટર ધર્મેન્દ્ર સરયુપ્રસાદ યાદવ (ઉ.વ.30)ને રાજકોટ એન્ટિકરપ્શન બ્યુરોની ટીમે સિફતાઈપૂર્વક જાળ ગોઠવીને રૂપિયા 5000ની લાંચ લેતા રંગેહાથ પકડી પાડ્યો છે. રાજકોટ એસીબી દ્વારા કેન્દ્રીય કચેરીઓના ખાઉંધરા કર્મીઓ પણ તાજેતરમાં આ બીજી ટ્રેપ થતાં અત્યાર સુધી બિન્દાસ્ત રહેનારા આવા બાબુઓમાં ફફડાટ ફેલાયો છે.
એસીબીની ટ્રેપ અંગે જાણવા મળેલી વિગતો મુજબ રાજકોટના યુવકે પિતરાઈ ભાઈ સાથે મળી કેન્દ્ર સરકારના ડ્રીમ પ્રોજેક્ટ સમા સ્ટાર્ટઅપ અંતર્ગત પોતાની ઈમ્પોર્ટ-એક્સપોર્ટ (આયાત-નિકાસ)ની બીક્ષપોર્ટ નામની ફર્મ શરૂ કરવા લાઈસન્સ મેળવ્યું હતું જેના સ્થળ વેરિફિકેશન સહિતની કાર્યવાહી રાજકોટ સેન્ટ્રલ જીએસટી ડિપાર્ટમેન્ટ દ્વારા કરવાની હતી અને તે માટે 20 વર્ષિય યુવકે જરૂરી પ્રોસિઝર કરી હતી.
વેરિફિકેશન માટેની કામગીરી સી-જીએસટી રાજકોટ કચેરીના ઈન્સ્પેક્ટર ધર્મેન્દ્ર સરયુપ્રસાદ યાદવ (ઉ.વ.30) હાથમાં હતી. ખાઉંધરા ઈન્સ્પેક્ટરે પ્રથમ દસ હજાર રૂપિયાની લાંચ માંગી હતી ત્યારબાદ 5000 રૂપિયા આપો તો ફાઈનલ રિપોર્ટ આપી દેશે કહી 5000ની રકમમાં મોં માર્યું હતું. હજુ નવી જ પેઢી શરૂ કરનારા યુવકને પ્રથમ ગ્રાસે મક્ષિકા જેવું થતાં અને યુવક લાંચ લેવા આપતો ન હોવાથી એસીબીનો સંપર્ક સાધ્યો હતો અને ઈન્સ્પેક્ટર વિરૂધ્ધ પુરાવાઓ સાથે ફરિયાદ આપી હતી.
આ પણ વાંચો:રાજકોટ મનપાનું 2026-27નું 3604.90 કરોડનું બજેટ મંજુર:રૂ. 95 કરોડનો કરબોજ ફગાવાયો, રેસકોર્સની થશે કાયાપલટ,3 પીંક બસ શરૂ કરાશે
એસીબીના નાયબ નિયામક બલદેવસિંહ વાઘેલાના માર્ગદર્શન હેઠળ ડીવાયએસપી જે.ડી. મેવાડાની રાહબરી હેઠળ પીઆઈ આર.આર. સોલંકી તથા ટીમે ટ્રેપગોઠવી હતી. ગઈકાલે રવિવારે રજાના દિવસે પણ નાણાં મળતા હોય તો આપવામાં ક્યા વાંધો, 5000 રૂપિયા સ્વીકારવા માટે ઈન્સ્પેક્ટર ધર્મેન્દ્ર યાદવ રેસકોર્સનાગ્રાઉન્ડમાં આવ્યો હતો અને બિન્દાસ્તપણે 5000 રૂપિયાની લાંચની રકમ લેતા જ અગાઉથી ગોઠવાયેલી એસીબીની ટીમે દબોચી લીધો હતો.
20 વર્ષિય વિદ્યાર્થીએ સ્ટાર્ટઅપમાં સ્ટાર્ટ લીધાની સાથે જ કડવો અનુભવ રાજકોટના વતની અને હાલ પૂણેમાં અભ્યાસ કરતાં 20 વર્ષિય વિદ્યાર્થીએ કેન્દ્ર સરકારના સ્ટાર્ટઅપ પ્રોજેક્ટમાં પ્રેરણા લઈને પોતાની પેઢી વ્યવસાય ફૈબાના પુત્ર સાથે મળીને ચાલુ કર્યો હતો. હજુ તો પેઢી ખુલી નથી, વ્યવસાય સ્ટાર્ટ પણ થયો નથી ત્યાં જ `વહીવટ’ (લાંચ) દેવાનું આવ્યું. યુવકે પોતે પોતાના જ નાણાંએ ઘરેથી કાંઈ નથી લીધું. આટલી રકમ પણ નથી જેથી લાંચ આપવા ઈનકાર કર્યો હતો. જો કે આરોપી ઈન્સ્પેક્ટરે કોઈપણ પાસેથી લઈને આપી દે કહીં લાંચ મળે પછી જ રિપોર્ટ મળશે જેવી જીદથી અકળાયેલા છાત્રએ એસીબીના દ્વાર ખટખટાવ્યા હતા. બીબીએનો અભ્યાસ કરતા છાત્ર બિઝનેસ એક્ષ્પો પણ યોજે છે. દુબઈમાં બે એક્ષ્પો કર્યા બાદ પૂણેમાં આયોજન કર્યું. યુવકે એસીબી સમક્ષ લાંચ માંગનાર સાથેના ઓડિયો ક્લિપ સહિતના પુરાવાઓ રજૂ કર્યા હતા અને એસીબીએ ટ્રેપ ગોઠવી હતી.
