અમદાવાદમાં મીડિયાકર્મી બની મહિલા પાસેથી ₹5 લાખ પડાવ્યા: નકલી પત્રકારો શુભમ શાહ અને સંકેત પ્રજાપતિ સામે ગુનો

અમદાવાદ શહેરમાં સોશિયલ મીડિયા પર ન્યૂઝ પેજ ચલાવી પોતાને પત્રકાર તરીકે ખપાવી નિર્દોષ નાગરિકોને બ્લેકમેલ કરતી તોળબાજ ટોળકીનો પર્દાફાશ થયો છે. આશ્રમ રોડ સ્થિત એક હોટલમાં મહિલાને પૂર્વઆયોજિત ટ્રેપમાં ફસાવી તેનો વીડિયો વાયરલ કરી બદનામ કરવાની ધમકી આપી ₹5 લાખની ખંડણી વસૂલવામાં આવી હતી. આ મામલે ભોગ બનનાર મહિલાની ફરિયાદના આધારે મહિલા ક્રાઈમ બ્રાંચે ‘સ્ટાર ન્યૂઝ સેવન’ નામનું પોર્ટલ ચલાવતા શુભમ શાહ અને સંકેત પ્રજાપતિ સહિતના શખ્સો સામે કાયદેસરનો ગુનો નોંધી તેમની ધરપકડ માટે ચક્રો ગતિમાન કર્યા છે.

નકલી મીડિયાકર્મીઓની ખંડણી ગેંગની મુખ્ય વિગતો

આશ્રમ રોડની હોટલમાં મહિલાને ટ્રેપ કરી ₹5 લાખ પડાવ્યા

પોલીસ ફરિયાદની વિગતો અનુસાર, અમદાવાદના આશ્રમ રોડ પર આવેલી એક હોટલના રૂમમાં ભોગ બનનાર મહિલાને મળવા એક યુવક પહોંચ્યો હતો. થોડી જ વારમાં પૂર્વઆયોજિત કાવતરા મુજબ અન્ય ત્રણ શખ્સો રૂમમાં ધસી આવ્યા હતા. તેમણે પોતાની ઓળખ ‘સ્ટાર ન્યૂઝ સેવન’ના પત્રકાર તરીકે આપી મહિલાનો અંગત વીડિયો સોશિયલ મીડિયામાં વાયરલ કરી બદનામ કરવાની સીધી ધમકી આપી હતી. લોકલાજ અને બદનામીના ડરથી ફફડી ઉઠેલી મહિલા પાસેથી આ શખ્સોએ સ્થળ પર જ ₹5 લાખની ખંડણી પડાવી લીધી હતી. આ બનાવ બાદ મહિલાએ હિંમત દાખવી મહિલા ક્રાઈમ બ્રાંચનો સંપર્ક કરી સમગ્ર હકીકત જણાવી હતી.

સીસીટીવી ફૂટેજથી ખુલી પોલ: આરોપીઓ અગાઉ પણ અનેક ગુનામાં સંડોવાયેલા

મહિલા ક્રાઈમ બ્રાંચે હોટલના સીસીટીવી (CCTV) કેમેરાના ફૂટેજ ચકાસી ટેકનિકલ સર્વેલન્સ હાથ ધરતાં ખંડણીખોરોની ઓળખ શુભમ શાહ અને સંકેત પ્રજાપતિ તરીકે થઈ હતી. પોલીસ તપાસમાં સામે આવ્યું છે કે આ બંને આરોપીઓ રીઢા ગુનેગાર છે અને તેમની સામે અગાઉ અમદાવાદના ગુજરાત યુનિવર્સિટી અને સેટેલાઈટ પોલીસ સ્ટેશન ઉપરાંત ભાવનગર જિલ્લાના મહુવામાં પણ છેડતી અને ખંડણીના ગંભીર ગુનાઓ નોંધાઈ ચૂક્યા છે. પોલીસ ફરિયાદ નોંધાતાં જ બંને મુખ્ય આરોપીઓ અને તેમના સાગરિતો ભૂગર્ભમાં ઉતરી ગયા છે.

નકલી પોલીસ બની વેપારીને ધમકાવ્યો, પાલડીમાં સલૂન સંચાલિકાને લૂંટી

આરોપીઓની ગુનાહિત કુંડળીમાં અન્ય ચોંકાવનારી વિગતો પણ સામે આવી છે. સૂત્રોના જણાવ્યા અનુસાર, આ ટોળકીએ અગાઉ બનાસકાંઠામાં એક વેપારીને નકલી પોલીસ બની બ્લેકમેલ કર્યા હતા, જ્યાં મામલો બિચકતાં માફી માંગી સમાધાન કર્યું હતું. આ ઉપરાંત રોહન વછેટા ઉર્ફે રોની નામના સાગરિતની મદદથી વેપારીઓને હનીટ્રેપ જેવી જાળમાં ફસાવી ધંધામાં ભાગીદારી પડાવવાના પ્રયાસો પણ કર્યા હતા. અમદાવાદના પોશ ગણાતા પાલડી વિસ્તારમાં એક સલૂનની મહિલા સંચાલિકાને ધમકાવી લૂંટ ચલાવવા અંગે પણ પાલડી પોલીસ મથકે અરજી થયેલી છે.

સોશિયલ મીડિયાના યુગમાં ડિજિટલ ન્યૂઝ પેજના નામે ઓળખકાર્ડ બનાવી નિર્દોષ નાગરિકોને ડરાવી-ધમકાવી ખંડણી વસૂલતી આવી ટોળકીઓ પત્રકારત્વના ક્ષેત્રને પણ કલંકિત કરી રહી છે. અમદાવાદ મહિલા ક્રાઈમ બ્રાંચે ગુનો નોંધી ફરાર આરોપીઓની ધરપકડ માટે અલગ-અલગ ટીમો બનાવી દરોડા શરૂ કર્યા છે. આ ગેંગ પકડાયા બાદ અન્ય કેટલા નિર્દોષ લોકો તેમના બ્લેકમેઇલિંગનો ભોગ બન્યા છે તેની વધુ વિગતો બહાર આવવાની પૂરી સંભાવના છે.