કેના, થુજા, લોસોનીઆ, ડ્યુરાન્ટા: રાજકોટનું લાયન સફારી પાર્ક 166 ફુલોથી મઘમઘશે, કામગીરી 95% પૂર્ણ થયાનો દાવો
રાજકોટના પ્રદ્યુમન પાર્ક ઝૂની બાજુમાં જ છેલ્લા 2 વર્ષથી તૈયાર થઈ રહેલા લાયન સફારી પાર્કનું કામ અંતિમ તબક્કામાં પહોંચ્યું છે ત્યારે હવે એન્ટ્રન્સ પ્લાઝા સહિતની જ કામગીરી બાકી હોય મેના અંત અથવા જૂનનો પ્રારંભ કે જ્યારે વેકેશન ચાલતું હોય ત્યારે જ પાર્ક ખુલ્લો મુકવા તૈયારીઓ ચાલી રહી છે. આ પાર્કમાં સિંહ-સિંહણને ખુલ્લામાં વિહરતાં જોઈ શકાશે. આ માટે ખાસ કારની પણ વ્યવસ્થા કરવામાં આવશે. બીજી બાજુ આ પાર્કની અંદર 166 પ્રકારના રોપાનું વાવેતર પણ કરવામાં આવનાર હોવાનું જાણવા મળ્યું હતું.
ખાસ કરીને પાર્કમાં 18 રૂપિયાના વડેલિયાથી લઈને 7490 રૂપિયાના એક એવા બીસ્માર્કિયા નોબીલી પામનું વાવેતર કરવામાં આવશે. આ ઉપરાંત બોગનવેલિયા, નેરિયમ વેરાયટીઝ, બારલેરિયા, નીકોડેવીયા, થુજા, લોસોનીઆ, ડ્યુરાન્ટા, કેના, કેલીયેન્ડા, કોલીયસ, કેશીયા, રૂસેલિયા, એકેલીફા, હીબિસ્કસ રોઝા, ઝરબેરા, ઓપીયો પોગમ ગ્રાસ, વર્બિના, ઓફિસ ફ્લાવર્સ, પોટેટો ક્રિપર ટીકોમા, રાતરાણી, હેમેલિયા, ક્રીશેન્થીમમ, ગુલાબ, થુમ્બરજીયા, અલ્ટરનેન્થરા, એસ્પેરેગસ, ક્રોટોન્સ, ડે્રસના, એરેકા પામ, પેડીલેન્થસ સહિત 166 પ્રકારના રોપાનું વાવેતર કરવામાં આવશે.
આ ઉપરાંત આકર્ષક એન્ટ્રન્સ ગેટ બનાવવા માટેનું પણ ટેન્ડર પ્રસિદ્ધ કરી દેવામાં આવ્યું છે. આ તમામ પાછળ કુલ 1.94 કરોડ રૂપિયાનો ખર્ચ કરવામાં આવશે.
આ અંગે ગાર્ડન શાખાના અધિકારી ભાવેશ જાકાસણિયાએ જણાવ્યું કે ટેન્ડર પ્રક્રિયામાં ભાગ લેવાની 13 એપ્રિલ છે અને 18 એપ્રિલે ઓનલાઈન બીડ ખોલવામાં આવશે. એકંદરે ટેન્ડર પ્રક્રિયા પૂર્ણ થ્ય બાદ કામ આપ્યા પછી મેના અંત અથવા જૂનના પ્રારંભ સુધીમાં કામ પૂર્ણ કરી દેવાશે.
અત્રે એ પણ ઉલ્લેખનીય છે કે એપ્રિલ દરમિયાન મહાપાલિકામાં ચૂંટણીની આચારસંહિતા અમલી હોવાથી સ્ટેન્ડિંગ કમિટીની બેઠક મળેલી હોય તો પણ દરખાસ્ત પેન્ડીંગ રાખવામાં આવનાર હોય સંભવત: ચૂંટણી પૂર્ણ થયા બાદ દરખાસ્તને મંજૂરી અપાય તેવી શક્યતા પણ નકારી શકાતી નથી. એકંદરે અત્યારે પાર્કનું કામ 95% પૂર્ણ થયાનો દાવો પણ કરવામાં આવી રહ્યો છે.
