બુટલેગરના ગેરકાયદે મકાન પર ફરી વળ્યું બુલડોઝર : Morbiના માળીયામાં દારૂની રેડ મામલે પોલીસ પર હુમલો કરવા મામલો કાર્યવાહી

મોરબીના માળીયા મિયાણાના ખરાઈ ગામે રેડ કરવામાં ગયેલી પોલીસની ટીમ પર બુટલેગર અને તેના પરિવાર દ્વારા હુમલો કરવાની ઘટના સામે આવી હતી જેમાં 6 પોલીસકર્મીઓ ઇજાગ્રસ્ત થયા હતા ત્યારે આ મામલે કાર્યવાહી કરવામાં આવી છે. બુટલેગરનું ગેરકાયદેસર મકાન તંત્ર દ્વારા તોડી પાડવામાં આવ્યું છે. બુટલેગરનું આ મકાન સરકારી જમીનમાં ઊભું કરવામાં આવ્યું હતું જેના પર આજે બુલડોઝર ફરી વળ્યું હતું.

શું છે સમગ્ર મામલો ??

મળતી વિગતો અનુસાર આ ઘટના ગત 5 તારીખે બની હતી જ્યાં પોલીસ પીઆઇની આગેવાની હેઠળ રેડ કરવામાં આવી હતી. ત્યારે સ્થળ ઉપરથી બુટલેગરને દારૂના જથ્થા સાથે પકડવામાં આવ્યો હતો. જો કે બુટલેગર અને દારૂનો જથ્થાને છોડાવવા માટે પોલીસ ઉપર હથિયાર સાથે જીવલેણ હુમલો કરવામાં આવ્યો હતો, જેથી કરીને છ પોલીસ કર્મચારીને ઈજા થઈ હતી. તેઓને સારવાર માટે મોરબીની ખાનગી હોસ્પિટલમાં ખસેડવામાં આવ્યા હતા. જે તે સમયે માળિયા તાલુકા પોલીસ સ્ટેશન ખાતે ઇકબાલ ઉર્ફે ઇકો હાજીભાઈ મોવર તથા મહિલાઓ સહિત કુલ મળીને 10 વ્યક્તિની સામે ગુનો નોંધાયો હતો. જે પૈકી સાત મહિલા અને ઇકબાલ મોવર તથા તેના પિતા હાજીભાઇ મોવર સહિત કુલ નવ આરોપીને પકડવામાં આવ્યા હતા અને એક આરોપી હજુ પોલીસ પકડથી દૂર છે.

ગેરકાયદેસર દબાણ કરીને પાકું મકાન બનાવવામાં આવ્યું

આ દરમિયાન પોલીસ દ્વારા રેવન્યુ વિભાગમાંથી માહિતી મેળવવામાં આવતા ઈકબાલ ઉર્ફે ઇકો જે જગ્યા ઉપર રહે છે, ત્યાં બાજુમાં તેના ભાઈ રફિક હાજીભાઈ મોવર દ્વારા ખીરાઈ ગામના સર્વે નંબર 192માં સરકારી જમીન પર 900 ચો.મીટર જેટલી જગ્યામાં ગેરકાયદેસર દબાણ કરીને પાકું મકાન બનાવવામાં આવ્યું હતું. જ્યાં દેશી દારૂનો ધંધો કરીને મેળવેલી આવકમાંથી તેણે આ મકાન બનાવ્યું હોવાનું બહાર આવ્યું હતું.

ત્યારે આજે બુટલેગર ઈકબાલનું ગેરકાયદેસર મકાન તોડી પાડવાની કામગિરી કરવામાં આવી હતી. માળીયાના મામલતદાર એચ.સી. પરમાર સહિતની રેવન્યુ વિભાગની ટીમ દ્વારા ડીવાયએસપી સમીર સારડા સહિતના પોલીસ અધિકારીઓની ટીમને સાથે રાખીને ચુસ્ત પોલીસ બંદોબસ્ત વચ્ચે સરકારી ખરાબાની જગ્યામાં ખડકી દેવામાં આવેલા પાકા મકાન ઉપર જેસીબી અને હીટાચી મશીન ફેરવી દઈને દબાણને તોડી પાડવામાં આવ્યું છે અને સરકારી જમીનને ખુલ્લી કરાવવામાં આવી છે.