APPLE લવર્સ ચેતજો! રાજકોટના સરદારનગર રોડ પર પોલીસે મોબાઈલની 5 દુકાનમાંથી એપલની નકલી એસેસરીઝનો જથ્થો ઝડપ્યો
રાજકોટમાં છેલ્લા ઘણા સમયથી એપલ કંપનીની નકલી મોબાઈલ એસેસરીઝનું વેચાણ થઈ રહ્યાની જાણ કંપનીને થતાં આખરે પોલીસને સાથે રાખી સરદારનગર મેઈન રોડ ઉપરની પાંચ દુકાનમાં ચેકિંગ કરાતા ત્યાંથી 5.05 લાખની કિંમતનો નકલી એસેસરીઝનો જથ્થો પકડાતા વેપારીઓ સામે એ-ડિવિઝન પોલીસ મથકમાં ગુનો નોંધાયો હતો.
આ અંગે એકલ કંપનીના ટ્રેડમાર્ક તેમજ કોપીરાઈટના અધિકારોના રક્ષણ તેમજ કોપીરાઈટ ભંગ થતો હોય તો ફરિયાદી કરવાની સત્તા ધરાવતા ગ્રીફીન ઈન્ટેલએંચ્યુઅલ કંપનીના મેનેજર વિશાલસિંહ હિરાસિંહ જાડેજા અને તેમની ટીમે એ-ડિવિઝન પોલીસ મથકના સ્ટાફને સાથે રાખી સરદારનગર મેઈન રોડ પર જય બાલાજી મોબાઈલ એસેસરીઝમાં તપાસ કરતાત્યાંથી એપલ સિમ્બોલવાળા 188 નંગ મોબાઈલ કવર, એપલ સિમ્બોલવાળા આઠ એરપોર્ટ મળી આવતા તેના માલિક આકાશ રામભાઈ તલરેજ (ઉ.વ.34, રહે.સાધુ વાસવાણી કુંજ રોડ, રેલનગર) સામે ગુનો નોંધાયો હતો.
આ ઉપરાંત મહાદેવ મોબાઈલ કવર નામની દુકાનમાંથી એપલ સિમ્બોલવાળા 183 કવર, એપલ સિમ્બોલવાળા યુએસબી એડેપ્ટર, યુએસબી કેબલ, પ્રો-બ્લેક કલરના એરપોર્ટ, સફેદ કલરના એરપોર્ટ મળી આવતાં દુકાનના સંચાલક ભાવારામ ખુમારામ ચૌધરી સામે ગુનો નોંધાયો હતો. આ જ રીતે કવર ઝોન નામની મોબાઈલની દુકાનમાંથી 200 નંગ મોબાઈલ કવર, છ નંગ કેબલ, એક એરપોર્ટ અને પાવર બેન્કનો જથ્થો મળી આવતા દુકાનના સંચાલક પ્રેમલ કિશોરભાઈ રાચ્છ સામે ગુનો નોંધ્યો હતો. ટફન ઝોન નામની દુકાનમાં તપાસ કરતા ત્યાંથી 115 કવર, પાંચ નંગ કેબલ, 35 વોલ્ટનું ચાર્જિંગ એડોપ્ટર મળી આવતા રામ રણછોડભાઈ ડાંગર સામે ગુનો દાખલ કરવામાં આવ્યો હતો. ટફનવાલા મોબાઈલની દુકાનમાં તપાસ કરતાં ત્યાંથી 83 નંગ મોબાઈલ કવર અને પાંચ નંગ બેક પેનલ મળી આવતાં તેના સંચાલક હર્ષ અજયભાઈ કિલ્જી સામે ગુનો નોંધવામાં આવ્યો હતો.
એકંદરે પોલીસ દ્વારા કુલ 5.05 લાખનો મુદ્દામાલ કબજે કરાયો હતો. પ્રારંભિક તપાસમાં ખુલ્યા પ્રમાણે ઉપરોક્ત દુકાનમાં દિલ્હી સહિતના રાજ્યોમાંથી બ્રાન્ડેડ કંપનીનો ડુપ્લીકેટ સામાન આવતો હતો. આ સામાન અત્યંત સસ્તા ભાવે ખરીદ કર્યા બાદ રાજકોટમાં મોંઘા ભાવે જાણે કે અસલ જ હોય તે રીતે તેનું વેચાણ કરવામાં આવતું હતું.
