અમરેલીનો ધાતરવાડી-૨ રાયડી ડેમ ઓવરફ્લો: ભાદય-૨ ૭૦ ટકા ભરાયો
સૌરાષ્ટ્ર-ગુજરાતમાં ભારે વરસાદના કારણે નદીઓ ગાંડીતૂર બની છે અને જળાશયોમાં નવા નીરની પુષ્કળ આવક શરૂ થઈ ગઈ છે ત્યારે ઉપલેટા પાસેનો વેણુ ડેમ રાતોરાત છલકાઈ ગયા બાદ ભાદર-૨ ડેમમાં પણ પાણીની પુષ્કળ આવક થતાં રાતોરાત ભાદર-૨ ડેમ પણ ૭૦ ટકા ભરાઈ ગયો છે. આ ઉપરાંત અન્ય પાંચ ડેમ પણ હાઈએલર્ટ જાહેર કરાયા છે. જ્યારે ધાતરવાડી અને રાયડી ડેમ ઓવરફ્લો થયો છે.
સૌરાષ્ટ્ર-ગુજરાતમાં છેલ્લા પાંચ દિવસથી મેઘરાજાએ તોફાની બેટિંગ શરૂ કર્યું છે જેના કારણે અમુક તાલુકામાં પડેલા ભારે વરસાદના કારણે નદી-નાળા છલકાઈ ગયા છે અને જળાશયોમાં પાણીની ધમધોકાર આવક શરૂ થઈ ગઈ છે જેના કારણે પીવાના અને સિંચાઈનો પ્રશ્ન હલ થઈ ગયો છે.
આ પણ વાંચો: કેન્દ્રીય મંત્રી શિવરાજે રાજ્યો માટે રૂપિયા 25 હજાર કરોડ રીલીઝ કર્યા
ધોરાજી-ઉપલેટા પંથકમાં પડેલા ભારે વરસાદના કારણે વેણુ-૨ ડેમ ઓવરફ્લો થઈ જતાં ડેમના પાટિયા ખોલી નાખવામાં આવ્યા છે ત્યારે ભાદર-૨ ડેમમાં પણ પાણીની પુષ્કળ આવક થતાં ભાદર-૨ ડેમ ૭૦ ટકા ભરાઈ ગયો છે.
જ્યારે સીઝનના પ્રથમ વરસાદમાં ઉપલેટાનો વેણુ-૨ ડેમ છલકાઈ જતાં તેના પાટિયા ખોલી નાખવામાં આવતા અત્યારે વેણુ-૨ ડેમની સપાટી ૭૮.૪૮ ટકા છે. જ્યારે રંઘોળા ડેમ ૭૫.૬ ટકા, સારણ ડેમ ૭૩.૩૭ ટકા, ખારો ડેમ ૭૦.૯૬ ટકા ભરાઈ જતાં નિચાણવાળા વિસ્તારમાં એલર્ટ જાહેર કરવામાં આવ્યું છે.
આ ઉપરાંત અમરેલી જિલ્લાનો ધાતરવાડી-૨ ડેમ ઓવરફ્લો થઈ ગયો છે જેના કારણે ડેમના છ દરવાજા ખોલવામાં આવ્યા છે. ડેમમાંથી પાણી છોડવામાં આવતા નિચાણવાળા વિસ્તારને એલર્ટ કરાયા છે અને નદીના પટમાં અવરજવર પર મનાઈ કરાઈ છે.
રાજુલા-ખાંભા વિસ્તારમાં આભ ફાટતા રાયડી ડેમ પણ ઓવરફ્લો થતાં હેઠવાસના ૧૧ ગામો હાઈએલર્ટ પર મુકવામાં આવ્યા છે.
