આણંદ પાસે ખાનગી બસ અને ટ્રક વચ્ચે અકસ્માતમાં 6નાં મોત
ખાનગી બસમાં પંચર પડતાં ઊભી હતી ત્યારે ટ્રકે ટક્કર મારતાં સર્જાયો અકસ્માત, 8 મુસાફરો ઘાયલ
અમદાવાદ-વડોદરા એક્સપ્રેસ હાઈ-વે ઉપર સોમવારે પરોઢિયે ચાર વાગ્યાની આસપાસ બનેલી એક ગમખ્વાર દુર્ઘટનામાં છ લોકોના મોત થયા હતા. જયારે આઠ જેટલા મુસાફરો ઘાયલ થયા હતા. મહારાષ્ટ્રથી રાજસ્થાન જતી ખાનગી ટ્રાવેલ્સની બસમાં પંચર પડતાં ટાયર બદલવાની કામગીરી કરાતી હતી ત્યારે પાછળથી આવેલા ટ્રકે આ ખાનગી બસને પાછળથી ઠોકર મારતાં રોડ ઉપર ઉભેલા મુસાફરો ઉપર બસનું ટાયર ફરી વળતાં છ મુસાફરોના ઘટના સ્થળે મોત નિપજ્યાં હતાં. જ્યારે આઠથી વધુ મુસાફરોને ઈજા પહોંચી છે.
ઘટનાની જાણ થતાં સ્થાનિક પોલીસ, ફાયર બ્રિગેડ અને 108નો સ્ટાફ ઘટના સ્થળે પહોંચ્યો હતો અને ઈજાગ્રસ્તોને સારવાર માટે હોસ્પિટલમાં ખસેડવામાં આવ્યા હતા.
અકસ્માત બાદ હાઈ-વેપરનો ટ્રાફીક જામ થઈ જતાં ટ્રાફીક પોલીસ તાત્કાલીક દોડી ગઈ હતી અને ટ્રાફીક વ્યવહાર પૂર્વવત કરાવ્યો હતો. એકસપ્રેસ હાઈવે પર બનેલી આ ઘટનાથી વડોદરા અને અમદાવાદ વચ્ચે મોડી રાત સુધી ટ્રાફીક જામ રહ્યો હતો.