ગૃહમંત્રી હર્ષ સંઘવીની હાજરીમાં 3,900 કિલો નશીલા પદાર્થો સળગાવાયા!!!
ગુજરાત સરકારની ‘ડ્રગ્સ મુક્ત ગુજરાત’ અને ‘ઝીરો ટોલરન્સ’ નીતિ અંતર્ગત રાજ્યમાં આજે ઐતિહાસિક કાર્યવાહી થઈ. ભરૂચના દહેજ ખાતે ગૃહમંત્રી હર્ષ સંઘવીની વિશેષ ઉપસ્થિતિમાં રાજ્યભરના NDPS કેસોમાં જપ્ત કરાયેલા ₹2,153 કરોડના નશીલા પદાર્થોનો વૈજ્ઞાનિક રીતે નાશ કરવામાં આવ્યો. કુલ 1,095 કેસનો 3,900 કિલોનો જથ્થો BEIL પ્લાન્ટમાં નષ્ટ કરી સરકારે ડ્રગ્સ માફિયાઓને કડક સંદેશ આપ્યો છે.
કેટલો અને ક્યાં થયો નાશ?
દહેજ સ્થિત BEIL – ભરૂચ એન્વાયરો ઈન્ફ્રાસ્ટ્રક્ચર લિમિટેડ ખાતે રાજ્યભરમાંથી જપ્ત કરાયેલા નશીલા પદાર્થોનો નિકાલ કરાયો.
– કુલ કેસ: 1,095 NDPS કેસ
– કુલ જથ્થો: 3,900 કિલોગ્રામ નાર્કોટિક્સ
– આંતરાષ્ટ્રીય બજાર કિંમત: અંદાજે ₹2,153 કરોડ
આ સમગ્ર પ્રક્રિયા લાકડિયા, ભચાઉ અને ભરૂચ સહિત 16 પોલીસ યુનિટોની સઘન હાજરીમાં અને તમામ કાનૂની પ્રક્રિયા બાદ પાર પાડવામાં આવી.
GACL ખાતે હેન્ડબુકનું વિમોચન અને સન્માન સમારોહ
નાશની પ્રક્રિયા બાદ GACL – ગુજરાત આલ્કલીઝ એન્ડ કેમિકલ્સ લિમિટેડ ખાતે વિશેષ કાર્યક્રમ યોજાયો. આ પ્રસંગે ગૃહમંત્રી હર્ષ સંઘવીએ ‘NDPS હેન્ડબુક’નું વિમોચન કર્યું. આ હેન્ડબુક પોલીસને NDPS કેસની તપાસ અને કાર્યવાહીમાં માર્ગદર્શક બનશે.
સાથે જ રાજ્યમાં ડ્રગ્સનું નેટવર્ક બસ્ટ કરનાર અને સફળ કામગીરી કરનાર પોલીસ અધિકારીઓ તથા બાતમીદારોને ‘ડ્રગ્સ રિવોર્ડ પોલિસી’ હેઠળ પ્રોત્સાહક ઇનામો આપીને સન્માનિત કરવામાં આવ્યા. કાર્યક્રમમાં પોલીસ વિભાગના વરિષ્ઠ અધિકારીઓ અને અન્ય સરકારી વિભાગોના ઉચ્ચ હોદ્દેદારો ઉપસ્થિત રહ્યા.
ગૃહમંત્રી હર્ષ સંઘવીનું નિવેદન
આ પ્રસંગે બોલતા ગૃહમંત્રી હર્ષ સંઘવીએ કહ્યું કે ગુજરાત સરકારની ડ્રગ્સ સામે ‘ઝીરો ટોલરન્સ’ નીતિ છે. યુવાધનને બરબાદ કરતા ડ્રગ્સ માફિયાઓ સામે રાજ્ય પોલીસની આવી આકરી કાર્યવાહી આગામી સમયમાં પણ સત ચાલુ રહેશે.
તેમણે ઉમેર્યું કે આટલા મોટા પ્રમાણમાં ડ્રગ્સનો નાશ કરીને રાજ્ય સરકારે સાબિત કર્યું છે કે ગુજરાતમાં નશાના કારોબાર માટે કોઈ જગ્યા નથી.
દહેજ ખાતેની આ કાર્યવાહી માત્ર ડ્રગ્સનો નિકાલ જ નહીં, પરંતુ ગુજરાત સરકારની ડ્રગ્સ વિરુદ્ધની સખત પ્રતિબદ્ધતાનો પુરાવો છે. પોલીસને મળી રહેલા સન્માન અને નવી હેન્ડબુકથી ભવિષ્યમાં ડ્રગ્સ વિરોધી અભિયાન વધુ મજબૂત બનશે તેવી આશા છે.
