રાજકોટમાં 300 કરોડનું બોગસ બિલિંગ કૌભાંડ પકડાયું: CGSTની ટીમનું મોટું ઓપરેશન,ત્રિપુટીની ધરપકડ, મોટા દસ્તાવેજી પુરાવાઓ હાથ લાગ્યા

રાજકોટ શહેરમાં CGSTની ટીમે મોટું ઓપરેશન હાથ ધર્યું છે. 150 ફૂટ રિંગરોડ પર આવેલા નક્ષત્ર નામના બિલ્ડિંગમાં ચાલતી બોગસ બિલિંગ ફર્મ પર દરોડા પાડીને 300 કરોડથી વધુનું કૌભાંડ પકડી પાડ્યું છે. પ્રાથમિક તબક્કે જ 50 કરોડથી વધુની વેરા શાખ (ટેક્સ ચોરી) ખૂલવા પામી છે. બોગસ બિલિંગ પેઢીના સંચાલકો પૈકીની ત્રિપુટીની ધરપકડ કરાઈ છે. રિમાન્ડ મેળવવાની તજવીજ હાથ ધરાઈ છે. રિમાન્ડ દરમિયાન વધુ કેટલાક ઘટસ્ફોટ થવાની સંભાવનાઓ દેખાઈ રહી છે.

CGSTના ઉચ્ચસ્તરીય સૂત્રોમાંથી રેઈડ સંદર્ભે પ્રાપ્ત થયેલી પ્રાથમિક માહિતી મુજબ રાજકોટમાં 150 ફૂટ રિંગરોડ પરના નક્ષત્ર બિલ્ડિંગમાં આવેલી ફર્મમાં બોગસ બિલિંગનું રેકેટ ચાલી રહ્યું હોવાની અધિકારીગણને માહિતી મળી હતી. જે આધારે CGSTના અધિકારીઓ ટીમ દ્વારા રેઈડ કરવામાં આવી હતી. મહાદેવ પ્રોપરાઈટર તેમજ કુબેર એન્ટરપ્રાઈઝ નામની ફર્મમાં સર્ચ ઓપરેશન હાથ ધરાયું હતું જેમાં બન્ને પેઢીઓ પરથી બોગસ બિલિંગના વ્યવહારો, ફિઝિકલ તથા ડિજિટલ ડેટા, દસ્તાવેજી પુરાવાઓ મળી આવ્યા હતા. સ્ટીલ બાર અને સિમેન્ટના વ્યવસાયકારોને બોગસ બિલો કાઢી આપ્યાનું જાણવા મળી રહ્યું છે.

તપાસ દરમિયાન પ્રાથમિક તબક્કે જ પેઢીઓ દ્વારા 300 કરોડથી વધુની કિંમતના બોગસ બીલો બનાવાયા હોવાનું જાણવા મળી રહ્યું છે. ટીમ દ્વારા કઈ કઈ કંપનીઓ, ફર્મને બીલો આપ્યા તે તરફ હવે તપાસનો દૌર લંબાવાયો છે. આરંભિક તપાસમાં જ 300 કરોડના બોગસ બીલો બનાવી સરકારી તિજોરીને 50 કરોડથી વધુનું કારસ્તાન ટેક્સ ચોરી કરાઈ હોવાનું ખૂલવા પામ્યાનું જાણવા મળી રહ્યું છે.બોગસ બિલિંગ આધારે 50 કરોડ જેટલી વેરા શાખ મેળવી લીધાનું ખૂલતા પેઢીના જીલ અમલાણી, વિશાલ મુલીયા અને અજય લાઠિયા નામના ભેજાબાજ ત્રિપુટીને સીજીએસટી ટીમે એરેસ્ટ  કરી છે. ત્રણેયના રિમાન્ડ મેળવવા કાર્યવાહી હાથ ધરાઈ છે.

આ પણ વાંચો :રાજકોટની સમરસ હોસ્ટેલના વિદ્યાર્થીઓને અપાતા ભોજનની ક્વોલિટી જાણી શિક્ષણમંત્રી ચોંક્યા: ડો.પ્રદ્યુમન વાંઝાએ સમાજ કલ્યાણ અધિકારીને ખખડાવ્યા

રિમાન્ડ દરમિયાન ત્રણેયની પૂછતાછમાં અન્ય કોઈની સંડોવણી કે કેમ ? કઈ કઈ ફર્મ સાથે વ્યવહારો ચાલતા હતા ? સહિતના મુદ્દે ઉંડાણભરી તપાસમાં રેકેટમાં વધુ કોઈના નામ ખૂલવાની શક્યતા પણ સેવાઈ રહી છે. સીજીએસટી દ્વારા હાથ ધરાયેલા ઓપરેશનથી અન્ય આવા બોગસ બિલિંગવાળા ધંધાર્થીઓ, પેઢીઓમાં ફફડાટ ફેલાયો છે.

ભાવનગર બાદ રાજકોટ પણ જાણે બની રહ્યું છે બોગસ બિલિંગનું હબ..!!

રાજકોટ શહેરમાં CGSTએ પકડેલા 300 કરોડના બોગસ બિલિંગ કૌભાંડ પૂર્વે થોડા વખત પહેલાં સ્ટેટ જીએસટી દ્વારા રાજકોટમાંથી 500 કરોડ જેવું બોગસ બિલિંગ રેકેટ પકડી લેવામાં આવ્યું હતું. બોગસ બિલિંગ માટે એક તબક્કે રાજ્યભરમાં કે આંતરરાજ્ય સ્તરે ભાવનગર જિલ્લાનું નામ પંકાયેલું હતું. ભાવનગર પંથકમાંથી મોટા-મોટા રેકેટ પકડાઈ ચૂક્યા છે. રાજકોટ પણ બોગસ બિલિંગ માટેનું હબ બની રહ્યું હોય તેમ રાજકોટમાં ટૂંકાગાળામાં જ 500 બાદ ફરી 300 કરોડનું કૌભાંડ ખૂલ્યું છે.