રાજકોટની એગ્રો કંપની સાથે 194 કરોડની છેતરપિંડી ! મહારાષ્ટ્ર, આંધ્રપ્રદેશ, UP સહિતના રાજ્યોના 19 આરોપીઓને શોધવા ટીમ રવાના
રાજકોટના વેપારીઓ સાથે અન્ય રાજ્યના શખ્સો દ્વારા લાખો-કરોડો રૂપિયાની છેતરપિંડી આચરવામાં આવતી હોવાની ઘટનાઓ અત્યાર સુધીમાં અનેક વખત બની ચૂકી છે ત્યારે હવે છેતરપિંડીનો આંક અબજની રકમે પહોંચી જવા પામ્યો હોવાનું બહાર આવ્યું છે. નવલનગર વિસ્તારમાં ધર્મભક્તિ વેન્ચર પ્રા.લિ. નામની એગ્રો પ્રોડક્ટ લે-વેચની કંપની ધરાવતાં ત્રણ ભાગીદારો સાથે અધધ 194 કરોડ રૂપિયાની છેતરપિંડી થયાની ફરિયાદ નોંધાતાં પોલીસમાં દોડધામ થઈ જવા પામી છે.
મુંબઈની કંપનીએ ત્રણેય ભાગીદારોને હળદરતી ખેતી માટે `પોલી હાઉસ’ બનાવવાના નામે જાળમાં ફસાવ્યા બાદ 64 કરોડ રૂપિયા ખંખેરી લીધા બાદ વળતરના નામે ફદિયુ’ય ચૂકવ્યું ન્હોતું.
આ અંગે બીગબજાર પાછળ જગન્નાથ શેરી નં.2માં શ્રી વલ્લભ સદન નામના મકાનમાં રહેતા પ્રશાંત પ્રદીપભાઈ કાનાબારે ક્રાઈમ બ્રાન્ચમાં નોંધાવેલી ફરિયાદમાં જણાવ્યું કે ધર્મભક્તિ વેન્ચર પ્રા.લિ. કંપનીમાં તેના ઉપરાંત ધવલ પ્રદીપભાઈ કાનાબાર અને ઈન્દ્રવદનભાઈ બાબુલાલ બારોટ એમ ત્રણ ભાગીદાર છે. તેમણે છેતરપિંડી થયા અંગેની તા.3-12-2024ના પોલીસ કમિશનર સમક્ષ અરજી કર્યા બાદ હવે ફરિયાદ લેવામાં આવી છે.
પ્રશાંતના જણાવ્યા પ્રમાણે જૂન-જૂલાઈ 2021માં હિંમતનગર કંપનીના કામથી ગયો હતો ત્યારે ત્યાં ચંદ્રકાંત પટેલ નામની વ્યક્તિ મળી હતી. ચંદ્રકાંત સાથે પરિચય થતાં તેણે પ્રશાંતને કહ્યું હતું કે તેમની પાસે હળદરની ખેતીનો પ્રોજેક્ટ છે. આ પ્રોજેક્ટ મુંબઈની એ.એસ.એગ્રી એન્ડ એક્વા એલ.એલ.પી. સાથે પાંચ એકર જમીનમાં શ- થર્યો છે. આ કંપની જમીનમાં પોલી હાઉસ ઉભું કરી તેમાં હળદર ઉગાડી વેચવાનું કામ કરે છે. આપણે ફક્ત વીજળી તેમજ પાણી પૂરું પાડવાનું અને જે રકમનું આપણે રોકાણ કર્યું હોય તે રોકાણના એક વર્ષ બાદ પ્રથમ વખત રોકેલી રકમ કંપની દર વર્ષે છ વર્ષ સુધી પરત આપે છે અને હળદરની ખેતીના માણસો સહિતની જવાબદારી કંપની સંભાળશે.
આ પછી પ્રશાંત ચંદ્રકાંત પટેલનો પ્રોજેક્ટ જોવા ગયો હતો જે સારો લાગતાં એ.એસ.એગ્રી એન્ડ એક્વા એલ.એલ.પીના ભાગીદાર હિરેન પટેલના સંપર્કમાં આવ્યો હતો. હિરેને પ્રશાંતને કંપનીની મેનેજર સાક્ષી પલ્લવ અને અવિનાશ સાંગલેનો મોબાઈલ નંબર આપી તેમને ત્રણ દિવસમાં રાજકોટ મોકલું છું તેવું કહ્યું હતું.
આ પછી અવિનાશ સાંગલે સાથે અમદાવાદમાં પ્રશાંતની મિટિંગ થઈ હતી. આ વેળાએ પ્રશાંતની કંપનીના ડિરેક્ટર ઈન્દ્રવદન બારોટ પણ હાજર હતા. અવિનાશે બન્નેને હળદરની ખેતીનો પ્રોજેક્ટ સમજાવ્યો હતો જે પ્રમાણે કંપનીમાં છ વર્ષ સુધી એગ્રીમેન્ટ કરાર મુજબ જમીન આપવાની અને તે જમીનમાં વીજળી, પાણી રાજકોટની કંપનીએ પૂરું પાડવાનું રહેશે. હળદરની ખેતીના પોલીસ હાઉસ ઉભું કરવા માટે એક એકરે અંદાજે બે કરોડનો ખર્ચો થાય તેમાંથી 1.20 કરોડ પ્રશાંતની કંપનીએ આપવાના અને 80 લાખ રૂપિયાનું રોકાણ એ.એસ.એગ્રી કંપની ઉભું કરશે તેમ જણાવ્યું હતું.
હળદરની ખેતી કરવા માટેના બીયારણના વાવેતર કરવાથી હળદરના વેચાણ સુધીની તમામ જવાબદારી કંપનીની રહેશે અને જ્યારથી પોલી હાઉસના રૂપિયા અને જમીન તેમને આપીએ ત્યારથી 16 મહિના પછીથી કંપની અમને દર એકરે 1.20 કરોડ રૂપિયાના રોકાણની સામે 1.20 કરોડ રૂપિયા છ વર્ષ સુધી પરત કરશે. એક એકર જમીન સામે અધર એક્ટિવિટી માટે બીજી એક એકર જમીન વધારે આપવાની રહેશે તે પ્રોજેક્ટ બહારની ગણાશે. બેઠક દરમિયાન પ્રશાંત અને ઈન્દ્રવદનને ખેતીના વીડિયો પણ બતાવાયા હતા.
ત્યારબાદ શખ્સોએ જે જે બેન્ક એકાઉન્ટ જણાવ્યા તેમાં પ્રશાંતની કંપનીએ કટકે કટકે 64.80 કરોડ રૂપિયા ટ્રાન્સફર આપ્યા હતા. આ પ્રક્રિયા પૂર્ણ થયા બાદ પ્રશાંત સહિતે દેવભૂમિ દ્વારકાના ધારાગઢ ગામ, ઈડર તાલુકાના રૂદરડી (જાદર) ગામ, સાબરકાંઠા જિલ્લાના હિંમતનગરના હાપા, કાટવડ ગામ સહિતના ગામોમાં કુલ 108 એકર છ વર્ષ સુધી લીઝ ઉપર ભાડા પેટે રાખી હતી અને તે પેટે 3,24,36,395 રૂપિયા ચૂકવી પણ દીધા હતા. આ પછી એ.એસ.એગ્રી એન્ડ એક્વા એલએલપી સાથે કોન્ટ્રાક્ટ ફાર્મિંગનું એગ્રીમેન્ટ કરવામાં આવ્યું હતું. આ બધું જ પૂરું થયા બાદ વળતર પેટે કશું જ ન મળતાં આરોપીઓએ થોડા દિવસમાં પૈસા ખાતામાં જમા થઈ જશે તેમ કહ્યું હતું પરંતુ લાંબા સમય સુધી પૈસા ન મળતાં આખરે પોલીસ કમિશનરને અરજી કરી હતી.
બોક્સ
કોની કોની સામે નોંધાયો ગુનો ?
સંદેશ ગણપત ખામકર (મુંબઈ)
પ્રશાંત ગોવિંદરાવ ઝાડે (મુંબઈ)
હિરેન દિલીપભાઈ પટેલ (નાગપુર)
રોહિત રમેશ લોન્કર (પૂના)
કમલેશ મહાદેવરાવ ઓઝે (પૂના)
સંદીપ ચિંતામણ સામંત (પૂના)
પ્રવીણ વામન પથારે (પૂના)
હર્ષલ મહાદેવરાવ ઓઝે (પૂના)
વૈભવ વિલાસ કોટલાપૂરે (પૂના)
સુરીન્દર અવતારસિંઘ ધીમન (પૂના)
નિરંજન ક્રિષ્નાનંદ કડલે (પૂના)
જયંતા રામચંદ્ર બાંદેકર (પૂના)
પ્રતીક વિનોદ શર્મા (પૂના)
સાંઈનાથ સંભાજીરાવ હાડોલે (કાકીનાડા-આંધ્રપ્રદેશ)
સેન્થીલકુમાર સેલ્વારાજ નાદર (મુંબઈ)
શંકર રાધાક્રિષ્ન નાયર (લખનૌ)
અવિનાશ બબન સાંગલે (મુંબઈ)
શ્રીનિવાસ તુલસીદાસ ભુસેવર (નાંદેડ-મહારાષ્ટ્ર)
નવનીતસિંઘ બીરીન્દરપાલસીંગ તુલી (નાગપુર)
બોક્સ
જૂલાઈથી સપ્ટેમ્બર સુધીમાં 53 કટકે 64.80 કરોડ ચૂકવ્યા
પ્રશાંત કાનાબારે નોંધાવેલી ફરિયાદમાં જણાવ્યું છે કે તેણે આરોપીઓ દ્વારા અપાયેલા બેન્ક એકાઉન્ટમાં જૂલાઈ-2021થી સપ્ટેમ્બર-2021 સુધીના બે મહિનામાં 53 કટકે બેન્ક મારફતે અલગ-અલગ ખાતામાં 64.80 કરોડ રૂપિયા ચૂકવ્યા હતા. આ તમામ પૈસા કયા કયા ખાતામાં ગયા તેના આધારે પોલીસે આરોપીઓની શોધખોળ શરૂ કરી અલગ-અલગ ટીમો બનાવી તપાસનો ધમધમાટ શરૂ કર્યો છે.
બોક્સ
આરોપીઓએ અમરેલી, વડોદરા અને થાણે-પૂણેમાં પણ આ જ એમઓથી કર્યું છે કૌભાંડ
પોલીસ ફરિયાદમાં જણાવ્યા પ્રમાણે પ્રશાંત કાનાબાર તેમજ તેના ભાગીદારો સાથે જે પ્રકારે છેતરપિંડી આચરવામાં આવી તે જ મોડેસ ઓપરેન્ડીથી આરોપીઓએ અમરેલી, વડોદરા, મહારાષ્ટ્રના થાણે તેમજ પૂણેમાં કર્યું હોવાનું અને તેમની સામે ફરિયાદ નોંધાઈ હોવાનો ઉલ્લેખ કરવામાં આવ્યો છે. એ.એસ.એગ્રી એન્ડ એક્વા એલએલપીના ભાગીદારો પૈકી સંદેશ ગણપત ખામકર, પ્રશાંત ગોવિંદરાવ ઝાડે અને સંદીપ ચિંતામણ સામંત હાલ જેલમાં હોવાનું સામે આવ્યું છે.
