૩૪ લાખના મુદ્દામાલ સાથે રાજસ્થાની ટ્રકચાલકની ધરપકડ
ભાવનગરમાં લઠ્ઠાકાંડે અનેક નિર્દોષ યુવાનોના જીવ લીધા છે આમ છતાં રાજ્યમાં દારૂની સપ્લાયને કોઈ ફેર પડ્યો નથી. રાજ્યના પોલીસવડા જ્ઞાનેન્દ્રસિંહ મલિકે દારૂના ધંધાર્થીઓ પર સતત ડ્રાઈવ રાખવા સૂચના આપી છે ત્યારે કચ્છ રેન્જ આઈજીની ટીમને મળેલી બાતમીના આધારે માળિયા ચોકડી પાસેથી ૩૪ લાખની કિંમતનો વિદેશી દારૂ અને બિયરના જથ્થા સાથે રાજસ્થાની ટ્રકચાલકની ધરપકડ કરવામાં આવી હતી.
આ અંગેની મળતી માહિતી મુજબ કચ્છ રેન્જ આઈજીની ટીમને મળેલી માહિતીના આધારે માળિયા મીયાણા ભીમાસર ચોકડી પાસે વોચ ગોઠવી હતી. દરમિયાન શંકાસ્પદ હાલતમાં નીકળેલા ટ્રકને અટકાવી તલાશી લેતા તાલપત્રી નીચે છૂપાવેલ વિદેશી દારૂ અને બિયરનો જથ્થો મળી આવ્યો હતો.
આ પણ વાંચો: 2021 માં 83 વિમાન બનાવવાનો HALને ઓર્ડર આપ્યો હતો પણ હજુ સુધી એક પણ નથી બન્યું
પોલીસે રૂા.૨૪.૦૩ લાખની કિંમતની વિદેશી દારૂ અને બિયરના ટીન મળી ૧૬,૯૨૪ બોટલ કબજે કરી હતી. જ્યારે ૧૦ લાખનો ટ્રક અને મોબાઈલ ફોન મળી ૩૪.૦૮ લાખનો મુદ્દામાલ કબજે કરી રાજસ્થાનના જાલોર જિલ્લાના ટ્રકચાલક ખેતારામ ઠાકુરામ માજીરાણાની ધરપકડ કરી હતી.
પોલીસની પૂછપરછમાં રાજસ્થાની ટ્રકચાલક બનાસકાંઠાથી દારૂનો જથ્થો કચ્છમાં આપવા જતો હતો જ્યારે દારૂનો જથ્થો રાજસ્થાનથી આવ્યો હોવાનું તપાસમાં ખૂલ્યું છે.
