146 વર્ષનો રેકોર્ડ તૂટ્યો, જૂન કોરોધાકોર સુકાયો, ગુજરાતમાં 79% પાણીની ઘટ
ચોમાસાની રાહ જોતા દેશવાસીઓ માટે ખરાબ સમાચાર છે. સુપર અલ-નીનોની અસરથી આ વર્ષે જૂન મહિનો છેલ્લા 146 વર્ષમાં સૌથી સુકો રહ્યો છે. કેરળમાં 4 જૂને સમયસર એન્ટ્રી માર્યા બાદ ચોમાસું 15 જૂનથી અટકી પડ્યું અને દેશભરમાં વરસાદે હડતાળ પાડી દીધી. સમગ્ર દેશમાં 40% અને મધ્ય ભારતમાં 60% ઓછો વરસાદ નોંધાયો છે. ગુજરાત તો 79% ઘટ સાથે બીજા નંબરે સૌથી વધુ સુકાયું છે.
દેશભરમાં વરસાદની ભારે ઘટ
જૂન મહિનો પૂરો થવા આવ્યો છતાં અનેક રાજ્યોમાં વરસાદના નામે મીંડું છે. દેશના 146 વર્ષના ઈતિહાસમાં આ જૂન સૌથી સુકો રહ્યો. કેરળમાં 4 જૂને ચોમાસું બેસી ગયા બાદ દક્ષિણ, પૂર્વ અને પૂર્વોતરમાં ફેલાયું, પણ 15 જૂન પછી ચોમાસાની ગાડી પાટે ચડી જ નથી. પરિણામે જૂનમાં પૂર્વોતર અને પૂર્વ ભારતમાં 44%, દક્ષિણ ભારતમાં 30% અને ઉત્તર-પશ્ચિમ ભારતમાં 27% ઓછો વરસાદ થયો છે.
કયા રાજ્યમાં કેટલી ઘટ?
રાજ્યવાર આંકડા ચોંકાવનારા છે. મેઘાલયમાં સૌથી વધુ 82% વરસાદની ઘટ નોંધાઈ છે. ગુજરાત 79% ઘટ સાથે બીજા ક્રમે છે. મણિપુરમાં 71%, છત્તીસગઢમાં 68%, ઝારખંડમાં 66%, મહારાષ્ટ્રમાં 59%, ઉત્તરપ્રદેશમાં 56%, ઓડિશામાં 52% અને બિહારમાં 50% ઓછો વરસાદ પડ્યો છે. હવામાન વિભાગ મુજબ 27 જૂન સુધીમાં ચોમાસાએ માત્ર 55% વિસ્તાર જ આવરી લીધો છે.
આ પણ વાંચો: અમેરિકા – ઈરાન વચ્ચે નવેસરથી ભીષણ યુદ્ધના એંધાણ
સુપર અલ-નીનો જવાબદાર, 25 વર્ષમાં 14 વખત વિલંબ
આ વખતે ચોમાસાના વિલંબ પાછળ સુપર અલ-નીનોને જવાબદાર ગણવામાં આવે છે. મુંબઈમાં ચોમાસું 12 દિવસ મોડું પહોંચ્યું. છેલ્લા 25 વર્ષમાં છ વખત અલ-નીનોની અસર જોવા મળી, જેમાંથી પાંચ વખત દુષ્કાળ પડ્યો. છેલ્લા 25 વર્ષમાં 14 વખત ચોમાસું મોડું પહોંચ્યું છે. જોકે રાહતની વાત એ છે કે 2019માં અલ-નીનો છતાં 10% વધુ વરસાદ થયો હતો. આ વર્ષે નિષ્ણાતો કુલ ચોમાસામાં માત્ર 10% ઘટનો અંદાજ લગાવી રહ્યા છે.
ગુજરાતમાં ત્રણ દિવસ વરસાદની આગાહી, 1 જુલાઈથી જામશે માહોલ
સુરત નજીક અટવાયેલું ચોમાસું હવે વેગ પકડે તેવા સંકેત છે. વેસ્ટર્ન ડિસ્ટર્બન્સ, સાયક્લોનિક સર્ક્યુલેશન અને ટ્રફ એમ ત્રણ સિસ્ટમ સક્રિય થતા હવામાન વિભાગે ત્રણ દિવસ વરસાદની આગાહી કરી છે. આજે છોટાઉદેપુર, નર્મદા, ડાંગ, તાપીમાં ભારે વરસાદ પડી શકે છે. પંચમહાલ, દાહોદ, મહિસાગર, વડોદરા, સુરત, નવસારી, વલસાડમાં 40-50 કિમીની ઝડપે પવન સાથે મધ્યમ વરસાદ પડશે. 1થી 4 જુલાઈ દરમિયાન દક્ષિણ ગુજરાત અને મધ્ય ગુજરાતમાં ભારે વરસાદની શક્યતા છે.
અમદાવાદીઓએ જોવી પડશે રાહ
અમદાવાદના લોકોએ વરસાદ માટે હજુ 3-4 દિવસ રાહ જોવી પડશે. આગામી બે દિવસ તાપમાન 40 ડિગ્રી આસપાસ રહેશે અને અસહ્ય ઉકળાટ રહેશે. જુલાઈના પહેલા સપ્તાહના અંતે કે બીજા સપ્તાહની શરૂઆતમાં અમદાવાદમાં સામાન્ય વરસાદ થવાની શક્યતા છે. જ્યારે સૌરાષ્ટ્ર-કચ્છના દરિયાકાંઠે ગરમી અને ઉકળાટ વધશે.
