આજે શનિવારથી ટી-20 વર્લ્ડકપ શરૂ થઈ રહ્યો છે જેમાં ભારત સહિત 20 દેશ ભાગ લેવાના છે. આ વર્લ્ડકપના મુકાબલા ભારત અને શ્રીલંકાના ગ્રાઉન્ડ ઉપર રમાવાના છે ત્યારે દરેક ગ્રાઉન્ડ પર 20 દેશના રાષ્ટ્રધ્વજ લહેરાતાં જોવા મળશે. આ તમામ રાષ્ટ્રધ્વજ સુરતમાં તૈયાર કરવામાં આવ્યા હોવાથી વર્લ્ડકપમાં દરેક ગ્રાઉન્ડ ઉપર સુરત લહેરાતું જોવા મળશે તેમ કહેવામાં અતિશ્યોક્તિ નથી.માત્ર રાષ્ટ્રધ્વજ નહીં બલ્કે ટી-શર્ટ, કેપ, સ્પોર્ટસવેયર તેમજ કાપડની અન્ય એસેસરીઝના પણ સુરતને મોટાપાયે ઓર્ડર મળ્યા હોવાથી આ વર્લ્ડકપ થકી સુરતને 100 કરોડથી વધુનો વેપાર મળશે. રાષ્ટ્રધ્વજ તૈયાર કરનાર ઉદ્યોગપતિએ જણાવ્યું કે ત્રણેક વર્ષથી આ પ્રકારે સુરતમાં રાષ્ટ્રધ્વજ તૈયાર કરવામાં આવી રહ્યા છે. વળી, આ રાષ્ટ્રધ્વજ માત્ર એક વખત ઉપયોગ માટે નહીં પરંતુ તેને રિસાઈકલ કરીને નવા ધ્વજ અથવા અન્ય કપડાં પણ બનાવી શકાશે.
રિ-સાઈકલ પ્લાસ્ટિકથી તૈયાર થયેલા 20 દેશના રાષ્ટ્રધ્વજ સુરતમાં તૈયાર થયાઃ વર્લ્ડકપથી સુરતની ટેક્સટાઈલ માર્કેટને મળશે 100 કરોડથી વધુનો વેપાર
