ગણેશ પંડાલ બાંધતી વખતે 15 યુવાનોને લાગ્યો વીજ કરંટ, 1નું મોત….
વડોદરા પાસે આવેલા પાદરાના ડબકા માં ગણેશ પંડાલ બાંધવાની કામગીરી સમયે બિમ જીવંત વિજ વાયરને અડી જતા એકનું સ્થળ પર જ મોત નિપજ્યું હતું. આ ઘટનામાં આશરે 15 જેટલા યુવકોને કરંટ લાગ્યો હતો. ગણોશોત્સવની રંગેચંગે ઉજવણી કરવાની તૈયારીઓમાં વડોદરા જિલ્લામાં યુવકનું મોત થયાનો આ વર્ષનો પહેલો કિસ્સો માનવામાં આવી રહ્યો છે.
હવે ગણોશોત્સવને માત્ર જુજ સમય બાકી છે. ત્યારે ડબકા ગામે રાત્રે યુવકો દ્વારા ગણેશજીના પંડાલનું કામકાજ કરી રહ્યા હતા. તેવામાં પંડાલનું બિમ (પાયો) 11 કેવીની ભારે વિજ લાઇનને અડી જતા તેમાં કરંટ ઉતર્યો હતો. જેથી કામકાજ કરતા 15 જેટલા યુવકોને કરંટ લાગ્યો હતો. આ ઘટનામાં સચિન ઉર્ફે બકાભાઈ નામના એક યુવક પર વધારે અસર વર્તાઇ હતી. અને યુવક ત્યાં જ ઢળી પડ્યો હતો. સ્થાનિકો દ્વારા કરવામાં આવેલા તમામ પ્રયાસો નિષ્ફળ રહ્યા હતા. યુવકને સારવાર મળી રહે તે માટે રેફરલ હોસ્પિટલમાં લઇ જવાયો હતો. પરંતુ મોડું થઇ ગયું હતું.
