અફઘાન સામે શ્રેણી-મેચ કબજે કરતી ટીમ ઈન્ડિયા

ઈન્દોરમાં ૬ વિકેટે મેળવી જીત: યશસ્વી-શિવમની ધમાકેદાર બેટિંગ

ભારતીય બેટરોએ ઈન્દોરના મેદાન પર ધૂમ મચાવતા અફઘાનિસ્તાનને કારમો પરાજય આપ્યો છે. ભારતીય ટીમે ત્રણ મેચની ટી-૨૦ શ્રેણીના બીજા મુકાબલામાં ૬ વિકેટે જીત હાંસલ કરી હતી. આ સાથે જ ભારતીય ટીમે શ્રેણી ૨-૦થી જીતી લીધી છે. શ્રેણીનો ત્રીજો મુકાબલો આવતીકાલે બેંગ્લોરમાં રમાશે. બન્ને ટીમો વચ્ચે પહેલી દ્વિપક્ષીય ટી-૨૦ શ્રેણી રમાઈ રહી હોવાથી ભારત પાસે ક્લિન સ્વિપ કરવાની તક છે.

આ મેચમાં ભારતને જીતવા માટે ૧૭૩ રનનો લક્ષ્યાંક મળ્યો હતો. જવાબમાં ભારતીય ટીમે ૧૫.૪ ઓવરમાં જ ચાર વિકેટે ગુમાવીને મેચ જીતી લીધી હતી. આ મેચનો હિરો યશસ્વી જયસ્વાલ અને શિવમ દુબે રહ્યા હતા. યશસ્વીએ ૨૭ અને શિવમે ૨૨ દડામાં ફિફટી લગાવી હતી. મેચમાં યશસ્વીએ ૩૪ દડામાં ૬૮ રન બનાવ્યા જેમાં ૬ છગ્ગા અને ૫ ચોગ્ગા સમાવિષ્ટ હતા. જ્યારે શિવમે ૩૨ દડામાં ૬૩ રનની અણનમ ઈનિંગ રમી હતી જેમાં ૪ છગ્ગા અને ૫ ચોગ્ગા સામેલ હતા. આ ઉપરાંત વિરાટ કોહલીએ ૨૯ રન બનાવ્યા હતા. અફઘાન વતી કરીમ જન્નતે ૨ વિકેટ ખેડવી હતી.