ગેઈલે એવો ચોગ્ગો માર્યો કે બેટના કટકા થઈ ગયા !
લેજન્ડસ લીગ ક્રિકેટ ટૂર્નામેન્ટમાં ગુજરાત જાયન્ટસ વતી રમી રહેલા ક્રિસ ગેઈલે એવો ચોગ્ગો માર્યો કે બેટના કટકા થઈ ગયા હતા ! ટૂર્નામેન્ટમાં ગુજરાતની ટકકર ભીલવાડા કિંગ્સ સામે થઈ હતી. આ મુકાબલો રાંચીમાં રમાયો હતો. છઠ્ઠી ઓવરમાં ઈંગ્લેન્ડના પૂર્વ ફાસ્ટ બોલર રેના સાઈડબોટમના બોલ પર ગેઈલે જોરદાર પ્રહાર કર્યો હતો. બોલ કવર ઉપરથી બાઉન્ડ્રી લાઈનને પાર કરી ગયો પરંતુ ગેઈલનું બેટ તૂટી ગયું હતું.
ક્રિસ ગેઈલે આ મુકાબલામાં માત્ર ૨૩ બોલમાં ફિફટી ફટકારી હતી. એક સમયે તે ૧૮ બોલમાં ૨૬ રન બનાવીને રમી રહ્યો હતો પરંતુ સાઈડબોટમની ઓવરમાં સળંગ પાંચ બોલમાં ૨૪ રન ઝૂડ્યા હતા. પહેલાં ગેઈલે સળંગ બે છગગા માર્યા અને આ પછીના ત્રણ બોલમાં ત્રણ ચોગ્ગા લગાવ્યા હતા. આ ઓવરમાં કુલ ૨૫ રન આવ્યા હતા. ગેઈલે ૨૭ બોલમાં ૮ ચોગ્ગા અને ૨ છગ્ગાની મદદથી ૫૨ રન બનાવ્યા હતા. આ મેચમાં ગુજરાતની ટીમે ૩ રને જીત મેળવી હતી.
