બોલરને ‘દાદાગીરી’ ભારે પડી !

યુએઈ-ન્યુઝીલેન્ડ વચ્ચે રમાયેલી ત્રણ મેચની ટી-20 શ્રેણીના નિર્ણાયક મુકાબામાં ન્યુઝીલેન્ડે 32 રને જીત મેળવી શ્રેણી પોતાના નામે કરી લીધી છે. આ મેચમાં યુએઈના બોલર જુનૈદ સિદ્દીકીએ ત્રણ વિકેટ ખેડવી હતી પરંતુ આ મેચમાં તેની એક હરકતને કારણે આઈસીસીએ તેને દંડ ફટકાર્યો છે.

જુનૈદ સિદ્દીકીની 25% મેચ ફી અને બે પોઈન્ટ કાપી લેવામાં આવ્યા છે. ફાઈનલ મેચમાં સિદ્દીકીને આઈસીસીના નિયમોનું ઉલ્લંઘન કરવાની મોટી સજા મળી છે. આઈસીસી કૉડ ઑફ ક્ધડક્ટ આર્ટિકલ 2.5 અનુસાર જ્યારે કોઈ બેટર આંતરરાષ્ટ્રીય મેચ દરમિયાન આઉટ થાય અને તેના ઉપર કોઈ ભાષા, ઈશારા અને ગુસ્સામાં કોઈ હરકત કરતો જોવા મળે તો તેને સજા મળે છે.

આ ઘટના ન્યુઝીલેન્ડની ઈનિંગની પાંચમી ઓવરમાં બની હતી જ્યારે સિદ્દીકીએ ટીમ સેફર્ટના આઉટ થયા બાદ જોરથી રાડો પાડી અને તેના તરફ દોડીને તેને આંખો બતાવી હતી. એટલું જ નહીં બલ્કે આ પછી તેણે વધુ એક નિયમ તોડ્યો હતો. તેણે ઈનિંગની 17મી ઓવરમાં અમ્પાયર સાથે દુર્વ્યવહાર કર્યો હતો. અમ્પાયરના નિર્ણયથી નાખુશ થઈને સિદ્દીકીએ પોતાની હદ્દ પાર કરી જે બદલ આઈસીસીએ તેને દંડ ફટકાર્યો હતો.