Asian Games 2026: ભારતીય મહિલા કબડ્ડી ટીમે ઈરાનને 37-34થી હરાવી ગોલ્ડ જીત્યો, સ્પર્ધાના 7મા દિવસે ભારતને મળ્યો ત્રીજો સુવર્ણ પદક

જાપાનના નાગોયા ખાતે રમાઈ રહેલી એશિયન ગેમ્સ 2026માં ભારતીય ખેલાડીઓનો વિજયરથ સતત આગળ ધપી રહ્યો છે. સ્પર્ધાના સાતમા દિવસે ભારતની વીરાંગનાઓએ માટ પર અદભુત રમત દાખવીને સમગ્ર દેશનું મસ્તક ગર્વથી ઊંચું કરી દીધું છે. હાઈ-વોલ્ટેજ ફાઇનલ મુકાબલામાં ઈરાનને પછાડીને ભારતીય મહિલા કબડ્ડી ટીમે સુવર્ણ પદક પર કબજો જમાવ્યો છે. આ જીત સાથે ચાલુ ગેમ્સમાં ભારતના ગોલ્ડ મેડલની સંખ્યા 3 પર પહોંચી ગઈ છે.

ફાઇનલમાં ઈરાન સામે રોમાંચક જંગ અને ઐતિહાસિક વિજય

નાગોયામાં યોજાયેલી મહિલા કબડ્ડી સ્પર્ધાની ફાઇનલ મેચ અત્યંત રોમાંચક રહી હતી. ભારતીય ખેલાડીઓએ રક્ષણાત્મક અને આક્રમક રમતનું ઉત્કૃષ્ટ સંતુલન બનાવી ઈરાનની ટીમને 37-34થી પરાજય આપ્યો હતો. એશિયન ગેમ્સના ઈતિહાસમાં ભારતીય મહિલા કબડ્ડી ટીમનો આ 4થો મેડલ છે. છેલ્લી ક્ષણો સુધી ચાલેલા દિલધડક મુકાબલામાં ભારતીય રેડર્સ અને ડિફેન્ડર્સે સમયસૂચકતા દાખવી મહત્ત્વના પોઇન્ટ્સ મેળવી ગોલ્ડ પાકો કર્યો હતો.

6ઠ્ઠા અને 7મા દિવસે મેડલનો વરસાદ: શૂટિંગ અને એથ્લેટિક્સમાં ઝળહળતો દેખાવ

ગેમ્સના છઠ્ઠા દિવસે પણ ભારતીય દળે શાનદાર લડત આપીને 1 ગોલ્ડ, 2 સિલ્વર અને 3 બ્રોન્ઝ સહિત કુલ 6 પદક જીત્યા હતા. શૂટિંગમાં શુરુચિ સિંહ અને કમલજીતે 10 મીટર એર પિસ્તોલ મિક્સ્ડ ઇવેન્ટમાં સુવર્ણ નિશાન સાધ્યું હતું. આ ઉપરાંત મેન્સ 50 મીટર રાઇફલ 3 પોઝિશન ટીમ તેમજ 10000 મીટર દોડમાં ગુલવીર સિંહે સિલ્વર મેડલ અંકે કર્યા હતા, જ્યારે શૉટ પુટ, પોલ વોલ્ટ અને ટેબલ ટેનિસ મિક્સ્ડ ડબલ્સમાં ભારતના ફાળે બ્રોન્ઝ આવ્યા હતા.

આ પણ વાંચો: અમદાવાદના નારોલમાં મંડપમાંથી 11 વર્ષીય બાળકીના લગ્ન અટકાવાયા: વરરાજા પણ 17 વર્ષનો સગીર, અગાઉ 3 દીકરીઓના પણ બાળલગ્ન કરાવાયાનો પર્દાફાશ

એશિયન ગેમ્સ 2026: ભારતીય મેડલ વિજેતાઓની સંપૂર્ણ યાદી

વિવિધ રમતોમાં ભારતીય એથ્લેટ્સનું પ્રભુત્વ

એશિયન ગેમ્સ 2026ના 7મા દિવસે પણ ભારતીય ખેલાડીઓ હોકી, બેડમિન્ટન, બોક્સિંગ, સ્ક્વોશ, તીરંદાજી, ફેન્સિંગ, સેલિંગ અને સર્ફિંગ જેવી સ્પર્ધાઓમાં મજબૂત સ્થિતિમાં જોવા મળી રહ્યા છે. મેડલ ટેલીમાં 27 પદકો સાથે ભારતનું પ્રદર્શન ઉત્સાહવર્ધક રહ્યું છે અને આવનારા દિવસોમાં પણ એથ્લેટિક્સ તથા અન્ય ટીમ ઇવેન્ટ્સમાં વધુ મેડલ આવવાની પ્રબળ સંભાવનાઓ છે.

મહિલા કબડ્ડી ટીમે હાંસલ કરેલી આ શાનદાર જીતે નાગોયા ખાતે ભારતીય દળનો ઉત્સાહ બમણો કરી દીધો છે. શૂટિંગથી લઈને પરંપરાગત કબડ્ડી સુધી ભારતીય એથ્લેટ્સ જે લડાયક મિજાજ દર્શાવી રહ્યા છે તે દેશના રમતગમતના સુવર્ણ યુગ તરફ નિર્દેશ કરે છે. સાતમા દિવસના અંતે ભારતની નજર હવે આવતીકાલની સ્પર્ધાઓ પર છે, જ્યાં દેશ વધુ વિક્રમો સર્જવા સજ્જ છે.