અશ્વિને એ કરી બતાવ્યું જે કોઈ કરી નથી શક્યું !!
- બાંગ્લાદેશ સામે હાંસલ કરી ઉપલબ્ધી: દુનિયાનો પ્રથમ બોલર બન્યો
રવિચંદ્રન અશ્વિને બાંગ્લાદેશ વિરુદ્ધ કાનપુર ટેસ્ટ મેચના ચોથા દિવસે ત્રણ વિકેટ ખેડવી હતી. આ સાથે જ તેણે ઈતિહાસ રચી દીધો હતો. અશ્વિન દુનિયાનો પહેલો બોલર બન્યો છે જેણે વર્લ્ડ ટેસ્ટ ચેમ્પિયનશિપની ત્રણેય સીઝનમાં ૫૦થી વધુ વિકેટ ખેડવી છે. ભારત-બાંગ્લાદેશ મેચનો ચોથો દિવસ અત્યંત રોમાંચક રહ્યો હતો. આ દિવસે બન્ને ટીમે મળીને ૪૩૭ રન બનાવ્યા અને ૧૮ વિકેટ પણ ખેડવી હતી જેમાંથી ત્રણ વિકેટ અશ્વિને લીધી હતી
.
આ સાથે જ અશ્વિને ડબલ્યુટીસી ૨૦૨૩-૨૫ની સાયકલમાં ૫૦ વિકેટ પૂરી કરી હતી. અશ્વિનની હવે આ સીઝનમાં ૫૨ વિકેટ થઈ ગઈ છે. ઑસ્ટે્રલિયાનો જોશ હેઝલવૂડ ૫૧ વિકેટ સાથે બીજા નંબરે છે. અશ્વિન અને હેઝલવૂડ બાદ પેટ કમીન્સ ૪૮ વિકેટ લઈને ત્રીજા ક્રમે છે. અશ્વિને આ પહેલા ડબલ્યુટીસીની પહેલી સીઝનમાં ૭૧ વિકેટ ખેડવી હતી. એ સમયે તે વિકેટ લેવા મામલે બીજા ક્રમે હતો. આ પછી તેણે બીજી સીઝનમાં ૬૧ વિકેટ મેળવી હતી. ઓવરઓલ વાત કરીયે તો અશ્વિન ડબલ્યુટીસીની ત્રણ એડિશનની ૩૭ મેચમાં ૧૮૨ વિકેટ ખેડવી ચૂકી છે. વધુ છ વિકેટ લેતાની સાથે જ તે નાથન લાયન (૧૮૭ વિકેટ)ને પાછળ છોડી દેશે.