સ્ટાર બોલરને આઠમા નંબરના બેટરે ઝૂડી નાખ્યો: એક ઓવરમાં લૂંટ્યા ૪૩ રન !
રોહિત-કોહલીને ત્રણ-ત્રણ અને પંતને ચાર વખત આઉટ કરનારા બોલરના નામે નોંધાયો શરમજનક રેકોર્ડ
વિરાટ કોહલી અને રોહિત શર્માને ત્રણ-ત્રણ વખત અને ઋષભ પંતને ચાર વખત આઉટ કરી ચૂકેલા ઓલી રૉબિન્સને જિંદગીમાં ક્યારેય ન વિચાર્યું હોય તેવી ધોલાઈ તેની થઈ છે. તેની એક જ ઓવરમાં આઠમા નંબરના બેટરે ૪૩ રન ઝૂડ્યા હતા.
ઓલી રૉબિન્સનની ધોલાઈથી સૌથી વધુ ખુશ હોય તો એ શોયેબ બશીર છે. શોયેબ બશીર પણ ઈંગ્લેન્ડનો જ ક્રિકેટર છે. એક સપ્તાહ પહેલાં શોયેબ બશીરે એક ઓવરમાં ૩૮ રન લૂંટાવ્યા હતા જે સૌથી મોંઘી ઓવરનો રેકોર્ડ હતો. શોયેબ બશીરનો આ શરમજનક રેકોર્ડ હવે ઓલી રોબિન્સનના નામે થઈ ગયો છે.
ઓલી રોબિન્સને આ રેકોર્ડ સસેક્સ-લીસ્ટરશર મુકાબલામાં બનવ્યો હતો. સસેક્સે કાઉન્ટી ચેમ્પિયનશિપ ડિવિઝન-૨ની આ મેચમાં લીસ્ટરશરને ૧૮ રને હરાવ્યું હતું. રોબીન્સન પોતાની ટીમ સસેક્સની જીત છતાં આ મેચને યાદ ક્યારેય કરશે નહીં તે પાક્કું છે !
સસેક્સે લીસ્ટરશરને જીત માટે ૪૬૪ રનનો લક્ષ્યાંક આપ્યો હતો. લીસ્ટરશરે તેના જવાબમાં એક સમયે ૧૪૪ રને છ વિકેટ ગુમાવી દીધી હતી. સસેક્સની જીત આસાન લાગી રહી હતી પરંતુ આઠમા નંબરે આવેલા લુઈસ કિંબરે તમામ બોલરોની બેફામ ધોલાઈ કરી હતી.
