રણજી ટ્રોફીનો સૌથી મોટો લક્ષ્યાંક હાંસલ કરી રેલવેએ રચ્યો ઈતિહાસ
૩૭૮ રન બનાવી ત્રિપુરાને પાંચ વિકેટે હરાવ્યું: પ્રથમ સિંહ-મોહમ્મદ સૈફની બેટિંગમાં કમાલ
રણજી ટ્રોફીમાં રેલવેએ ત્રિપુરા વિરુદ્ધ ટૂર્નામેન્ટનો સૌથી મોટા લક્ષ્યાંકને હાંસલ કરીને ઈતિહાસ રચી દીધો છે. અગરતલાના એમબીએ સ્ટેડિયમમાં રમાયેલી મેચમાં રેલવે વતી જીતનો હિરો ઓપનિંગ બેટર પ્રથમ સિંહ રહ્યો જેરે ૧૬૯ રનની અણનમ ઈનિંગ રમી હતી. આ મેચની પહેલી ઈનિંગમાં બન્ને ટીમ ૨૦૦ રનનો આંકડો સ્પર્શી શકી ન્હોતી જ્યારે બીજી ઈનિંગમાં બંને ટીમે ૩૦૦થી વધુ રન બનાવીને મેચને રોમાંચક બનાવી દીધી હતી. રેલવેએ આ મેચ પાંચ વિકેટના અંતરથી જીતી હતી.
આ મેચમાં રેલવેએ ટોસ જીતી પહેલાં બોલિંગ કરવાનો નિર્ણય લીધો હતો. જવાબમાં ત્રિપુરાની આખી ટીમ ૧૪૯ રને તંબુ ભેગી થઈ ગઈ હતી. બીજી બાજુ રેલવેની પહેલી ઈનિંગમ પણ ૧૦૫ રને જ સંકેલાઈ ગઈ હતી. આ પછી ત્રિપુરાએ પોતાની રમત બતાવી અને બીજી ઈનિંગમાં ૩૩૩ રન બનાવીને રેલવે સામે ૩૭૮ રનનો લક્ષ્યાંક રાખ્યો હતો.
લક્ષ્યાંકને હાંસલ કરતી વખતે રેલવેએ ૩૧ રનમાં ૩ વિકેટ ગુમાવી હતી. આ પછી ઓપનિંગ બેટર પ્રથમ સિંહ અને મોહમ્મદ સૈફ (૧૦૬ રન)એ ચોથી વિકેટ માટે ૧૭૫ રનની ભાગીદારી કરી જેના કારણે ટાર્ગેટ સરળ થઈ ગયો હતો. પ્રથમ સિંહ કેપ્ટન ઉપેન્દ્ર યાદવ (અણનમ ૨૭ ) સાથે ૧૬૯ રન (૧૬ ચોગ્ગા, ૧ છગ્ગો) બનાવીને અણનમ રહ્યા અને રેલવેએ ૧૦૩ ઓવરમાં પાંચ વિકેટ બાકી રાખીને કપરાં લક્ષ્યાંકને હાંસલ કર્યો હતો.
સૌરાષ્ટ્રનો રેકોર્ડ તૂટ્યો
આ વિશાળ લક્ષ્યાંક હાંસલ કરી રેલવેએ સૌરાષ્ટ્રના રેકોર્ડને તોડી નાખ્યો હતો. સૌરાષ્ટે્ર ૨૦૧૯-૨૦ની સીઝનમાં ઉત્તર પ્રદેશ વિરુદ્ધ ૩૭૨ રનનો લક્ષ્યાંક હાંસલ કર્યો હતો જે અત્યાર સુધીનો સૌથી મોટો ટાર્ગેટ હતો.
રણજી ટ્રોફી ઈતિહાસના હાંસલ થયેલા સૌથી મોટો લક્ષ્યાંક
લક્ષ્યાંક મેચ વર્ષ
૩૭૮/૫ રેલવે-ત્રિપુરા ૨૦૨૩-૨૪
૩૭૨/૪ સૌરાષ્ટ્ર-યુપી ૨૦૧૯-૨૦
૩૭૧/૪ આસામ-સર્વિસ ૨૦૦૮-૦૯
૩૬૦/૪ રાજસ્થાન-વિદર્ભ ૧૯૮૯-૯૦
૩૫૯/૪ યુપી-મહારાષ્ટ્ર ૨૦૨૧-૨૨