‘સ્વરાજ’ માટે ૧૬ ફેબ્રુઆરીએ મતદાન

Tue, January 21 2025

જૂનાગઢ મહાપાલિકા સહિત રાજ્યની ૬૬ નગરપાલિકાની ચૂંટણીનું એલાન
૧૮એ મત ગણતરી: ૨૧૭૮ બેઠક ઉપર જામશે જંગ

ઉપલેટા, જસદણ, જેતપુર અને ગોંડલ તાલુકા પંચાયતની પેટાચૂંટણી યોજાશે

ભાજપ, કોંગ્રેસ અનેઆપ’નું પાણી મપાશે

નવા વર્ષના પ્રારંભે જ સ્થાનિક સ્વરાજની ચૂંટણીના પડઘમ વાગી ચૂક્યા છે. રાજકીય પક્ષો માટે પ્રતિષ્ઠાનો જંગ ગણાતી મહાપાલિકા, નગરપાલિકા, જિલ્લા પંચાયત અને તાલુકા પંચાયતની ચૂંટણીનું એલાન રાજ્યના ચૂંટણી કમિશનર એસ.મુરલીક્રિષ્ના દ્વારા કરવામાં આવ્યું હતું. તેમણે કરેલી જાહેરાત પ્રમાણે ૧૬ ફેબ્રુઆરીએ જૂનાગઢ મહાપાલિકા સહિત રાજ્યની ૬૬ નગરપાલિકાની ચૂંટણી યોજાશે. આ તમામ મળી કુલ ૨૧૭૮ બેઠકો છે જેના ઉપર જંગ જામશે. આ સાથે જ રાજકોટ જિલ્લાની ઉપલેટા, જસદણ, જેતપુર અને ગોંડલ તાલુકા પંચાયત પર પેટાચૂંટણી પણ જાહેર કરવામાં આવી હતી.

ચૂંટણી કમિશનરના જણાવ્યા પ્રમાણે ૧૬ ફેબ્રુઆરીએ મતદાન થશે તો ૧૮ ફેબ્રુઆરીએ મત ગણતરી કરવામાં આવશે. ચૂંટણી માટેનું જાહેરનામું ૨૭ જાન્યુઆરીએ પ્રસિદ્ધ કરવામાં આવશે.

બેઠકવાઈઝ વાત કરવામાં આવે તો ૧૬ ફેબ્રુઆરીએ જૂનાગઢ મહાપાલિકાની ચૂંટણી યોજાશે. આ ઉપરાંત અમદાવાદ, સુરત અને ભાવનગર મહાપાલિકાની ત્રણ બેઠકની પેટા ચૂંટણી યોજાશે.

જ્યારે જામજોધપુરના ધ્રોલ અને કાલાવડ, દેવભૂમિ દ્વારકા જિલ્લાની સલાયા, દ્વારકા, ભાણવડ, જૂનાગઢ જિલ્લાની બાંટવા, માણાવદર, માંગરોળ, વિસાવદર, વંથલી, ચોરવાડ, ગીરસોમનાથની કોડીનાર, ભાવનગરની શિહોર, ગારીયાધાર તળાજા, બોટાદની ગઢત્તા, રાજકોટની જસદણ, જેતપુર-નવાગઢ, ધોરાજી, ભાયાવદર અને ઉપલેટા, મોરબીની હળવદ નગરપાલિકાની ચૂંટણી યોજાશે. આ સિવાય અમરેલીની સાવરકુંડલા, અમરેલી, દામનગર, સુરેન્દ્રનગરની લીંબડી, ધ્રાંગધ્રા નગરપાલિકાની ખાલી પડેલી બેઠકોની ચૂંટણી પણ ૧૬ ફેબ્રુઆરીએ જ યોજાશે. આ ઉપરાંત બોટાદ જિલ્લા પંચાયતમાં સામેલ પાળિયાદ બેઠકની પેટાચૂંટણી થશે.

તાલુકા પંચાયતની વાત કરવામાં આવે તો જામનગરની જોડીયા, જામવંથલી, મોરબીની વાંકાનેર, સુરેન્દ્રનગરની લીંબડી, સાયલા, ભાવનગરની તળાજા, શિહોર, અમરેલીની બાબરા, બગસરા, ધારી, દેવભૂમિ દ્વારકાની ખંભાળિયા, કલ્યાણપુર, જૂનાગઢની વંથલી, જૂનાગઢ, ગીર સોમનાથની ઉના, તાલાલા બેઠક પર પેટાચૂંટણી થશે. આ સિવાય રાજકોટ જિલ્લાની ડુમીયાણી, પાનેલી મોટી, જસદણની આંબરડી, ભાડલા, જેતપુરની પીઠડીયા, ગોંડલની સુલતાનપુર બેઠક ઉપર પેટાચૂંટણી યોજાશે.