રાજકોટમાં પોતાનું પહેલું ટીબી સેન્ટર બનાવશે મનપા
આ પ્રકારે સેન્ટર બનાવનારી રાજકોટ મહાપાલિકા પ્રથમ: ૨.૭૩ કરોડના ખર્ચે શહેરનું ૨૪મું આરોગ્ય કેન્દ્ર-ટીબી સેન્ટર બનશે રેલનગરમાં: ટેન્ડર પ્રસિદ્ધ
રાજકોટ સહિત સૌરાષ્ટ્ર-ગુજરાત તેમજ દેશમાં ટીબીના દર્દીઓમાં વધારો થઈ રહ્યો છે. આમ તો દરેક સરકારી હોસ્પિટલમાં અત્યારે ટીબીની સારવાર મળી રહી છે પરંતુ ત્યાં દર્દીઓની ભીડને કારણે લોકો જવાનું ટાળતા હોય છે. જ્યારે ખાનગી હોસ્પિટલમાં આ રોગની સારવાર ઘણી મોંઘી પડતી હોવાથી જરૂરિયાતમંદ દર્દીઓની હાલત કફોડી થઈ જાય છે. આ સમસ્યાને ધ્યાનમાં રાખી સરકાર દ્વારા દરેક મહાપાલિકાને પોતાનું ટીબી સેન્ટર બનાવવાનો આદેશ આપતાં જ રાજકોટ મનપાએ તેનું પાલન શરૂ કરી દઈને શહેરમાં પોતાનું પ્રથમ ટીબી સેન્ટર બનાવવા માટેની તૈયારી શરૂ કરી દીધી છે.
મનપા દ્વારા રેલનગરમાં વેકરિયા ચોક પાસે ૨.૭૩ કરોડના ખર્ચે આ ટીબી સેન્ટર બનાવવામાં આવશે જેનું ટેન્ડર પ્રસિદ્ધ કરવામાં આવશે. અહીં આરોગ્ય કેન્દ્ર બનાવવામાં આવશે જેના પ્રથમ માળે ટીબી સેન્ટર હશે જ્યાં મહિલા-પુરુષ માટે પાંચ-પાંચ બેડની વ્યવસ્થા કરવામાં આવશે. જ્યારે શહેરનું ૨૪મું આરોગ્ય કેન્દ્ર પણ અહીં જ બનાવવામાં આવશે. આ માટે ટેન્ડર ભરવાની છેલ્લી તારીખ ૧૮ જૂલાઈ છે જે પૂર્ણ થયા બાદ રસ દાખવનાર એજન્સી સાથે વાટાઘાટ કરીને સ્ટેન્ડિંગ કમિટી સમક્ષ દરખાસ્ત મોકલવામાં આવશે.
અત્રે ઉલ્લેખનીય છે કે ગુજરાતની આઠેય મહાપાલિકામાં અત્યારે ક્યાંય પણ પોતાનું ટીબી સેન્ટર નથી ત્યારે રાજકોટ મનપા આ મામલે પ્રથમ છે. રાજકોટ સિવિલમાં પણ અત્યારે ટીબીની સારવાર મળી રહી છે પરંતુ ત્યાં દર્દીઓનો અવિરત ધસારો હોવાને કારણે લોકો ખાનગી હોસ્પિટલ તરફ વળી રહ્યા છે. સારવાર ઉપરાંત ટીબીની દવા પણ એટલી જ મોંઘી હોવાને કારણે આર્થિક રીતે નબળા વગરના લોકો હેરાન-પરેશાન થઈ રહ્યા છે ત્યારે મહાપાલિકા દ્વારા પોતાનું ટીબી સેન્ટર બનાવવામાં આવતાં દર્દીઓને ઘણી રાહત મળશે.