મેયરને ગાય કરતાં મિટિંગ વધુ વ્હાલી !
ઢોરડબ્બામાં ૧૦૮ ગાય સહિત ૭૫૬ પશુના મોત મામલે રજૂઆત કરવા આવેલા કોંગ્રેસ આગેવાનોને સાંભળવાનો સમય પણ ન મળ્યો
પીએએ કહ્યું, મિટિંગમાં બ્રેક પડશે એટલે મેયર આવશે, બ્રેક પડ્યો પણ મેયર તો ન જ આવ્યા, આખરે ડે.મેયરે બધાને સાંભળ્યા
મેયર સુધી રજૂઆત કરવા જતાં જ જાળી બંધ કરી દેવાઈ, અનેકની અટકાયત
મહાપાલિકા દ્વારા રામવન પાસે બનાવાયેલા ઢોર ડબ્બામાં ત્રણ મહિનાની અંદર ૧૦૮ ગાય સહિત ૭૫૬ પશુ મોતને ભેટી જતાં જીવદયાપ્રેમીઓમાં અરેરાટી વ્યાપી જવા પામી છે. બીજી બાજુ આ મૃત્યુ પાછળ જે સંસ્થાને ઢોર ડબ્બાનું સંચાલન સોંપવામાં આવ્યું છે તે સંસ્થા જ જવાબદાર હોવાના આક્ષેપો પણ થઈ રહ્યા છે ત્યારે આ આક્ષેપની તપાસ કરી જો તેમાં સત્ય હોય તો સંસ્થા સામે પશુઓના મોત બદલ કાર્યવાહી કરવાની માંગણી સાથે કોંગ્રેસ કોર્પોરેટર સહિતના મેયરને રજૂઆત કરવા માટે દોડી ગયા હતા. જો કે મેયરને ગાય સહિતના પશુના મોત કરતાં મિટિંગ વધુ વ્હાલી હોય તેવી રીતે તેમણે તો રજૂઆત કરવા આવનારા લોકોને સાંભળ્યા જ ન્હોતા !
ત્રણેક મહિનાની અંદર ૭૫૬ પશુના મોત થયા હોવાનો સત્તાવાર એકરાર મહાપાલિકા દ્વારા જ કરાયા બાદ કોંગ્રેસ કોર્પોરેટર કોમલ ભારાઈ સહિતના નેતાઓ-કાર્યકરો રજૂઆત કરવા માટે મનપા કચેરીએ દોડી આવ્યા હતા. મેયર ચેમ્બરમાં પહોંચ્યા બાદ મેયરના પીએ ઘોણિયા દ્વારા આગેવાનોને કહેવાયું હતું કે મેયર અત્યારે મિટિંગમાં વ્યસ્ત છે એટલે મિટિંગમાં બ્રેક પડશે એટલે તેઓ આવશે. આ પછી કોંગ્રેસીઓ ત્યાં જ બેસી રહ્યા હતા.
ઘણો સમય રાહ જોયા બાદ પણ મેયરને મિટિંગમાંથી બહાર નીકળવાની ફુરસદ ન મળતાં આખરે કોંગ્રેસીઓ તેમને રજૂઆત કરવા માટે મિટિંગ સ્થળે જવા નીકળતાં ત્યાં હાજર એ-ડિવિઝન પોલીસ સ્ટાફ તેમજ વિજિલન્સ દ્વારા ઝાળી બંધ કરી તમામને અટકાવાયા હતા. સ્થિતિ બગડી રહ્યાનો ખ્યાલ આવતાં જ ડેપ્યુટી મેયર નરેન્દ્રસિંહ જાડેજા દોડી આવ્યા હતા અને તેમણે મેયરની ખુરશી પર બેસીને રજૂઆત સાંભળી હતી. આ પછી પણ કોંગ્રેસ દ્વારા હોબાળો મચાવાતાં તમામની અટકાયત કરાઈ હતી.
રસપ્રદ વાત એ છે કે મેયર જે મિટિંગમાં વ્યસ્ત હતા તે મિટિંગ એશિયા રેિઝિલિયન્ટ સિટીઝ પ્રોજેક્ટ અંતર્ગત હતી અને તેમાં એક ડેલિગેશન રાજકોટ આવ્યું હતું.
