રાજકોટમાં સતત બીજા દિવસે તાપમાન 40 ડિગ્રીને પાર

ઉનાળાની શરૂઆતથી જ ગરમીનો વધતો પ્રકોપ: લોકો ગરમીથી ત્રસ્ત થયા

રાજકોટ સહિત રાજ્યમાં હવામાન વિભાગની આગાહી પ્રમાણે તાપમાન ઉચકાઈ રહ્યું છે. બુધવારે રાજ્યમાં 40 ડિગ્રી સાથે રાજકોટ સૌથી ગરમ શહેર રહ્યું હતું. ગુરુવારે પણ બપોરના સમયે મહતમ 40 ડિગ્રી રહ્યું હતું. કાળઝાળ ગરમીથી લોકો પરસેવે રેબઝેબ થઈ ગયા હતા.

ગુરુવારે સવારે વાદળછાયું વાતાવરણ રહ્યા બાદ બપોરે ગરમીએ પોતાનો પ્રકોપ વરસાવ્યો હતો. બપોર સુધીમાં મહત્તમ તાપમાનનો પારો 40 ડિગ્રીને પર થઈ ગયો હતો. હોળી બાદ ઠંડીનું પ્રમાણ ઓછું થતું હોય છે જો કે રાજકોટમાં ઉનાળાની શરૂઆતથી જ આકરી ગરમી પડી રહી છે.

મહત્વનું છે કે, ચાલુ વર્ષે હોળી પહેલા જ ઉનાળાએ રંગ બતાવવાનું શરૂ કર્યું છે અને છેલ્લા 24 કલાક દરમિયાન રાજ્યના 14 શહેરોમાં મહત્તમ તાપમાન 38 ડિગ્રી કે તેથી વધુ રહેવા પામ્યું હતું. હવામાન વિભાગે બે દિવસ પોરબંદર, ગીર સોમનાથ, કચ્છમાં હીટવેવની આગાહી કરી છે. જ્યારે એક અઠવાડિયામાં તાપમાનનો પારો 42 ડિગ્રી સુધી પહોંચવાની સંભાવના છે ત્યારે રાજ્યના અનેક શહેરોમાં હીટવેવની અસર જોવા મળશે.

ગરમીમાં લૂ (હીટવેવ)થી બચવા આટલું કરો

* હીટવેવ દરમિયાન ઘરની બહાર નીકળવાનું ટાળવું જોઈએ,

* શક્ય હોય તો વધુ પડતો શ્રમ ટાળવો, તડકામાં ફરવાનું ટાળવું જોઈએ.

* બહાર નીકળતા સમયે આખું શરીર અને માથું ઢંકાઈ રહે તે રીતે સફેદ, સુતરાઉ,

ખૂલતાં કપડાં, ટોપી, ચશ્મા, છત્રીનો ઉપયોગ કરવો, સીધા સૂર્યપ્રકાશથી બચવું. 

* લીંબુ સરબત, મોળી છાસ, નારીયેળ પાણી, ઓ.આર.એસ. વગેરે પુષ્કળ પ્રમાણમાં પીવું જોઈએ.

* ઉપવાસ કરવાનું ટાળવું જોઈએ, બપોરનું ભોજન શક્ય હોય તો 12 વાગ્યા સુધીમાં લઈ લેવું જોઈએ.