રાજકોટ : વાગુદળના કાચતોડ મહંતના આશ્રમનો ગમે ત્યારે ઘડો લાડવો

રાજકોટના મહિલા કોલેજ ચોકમાં બઘડાટી બોલાવ્યા બાદ રેવન્યુંતંત્રએ નોટિસ ફટકારવા છતાં મહંત હાજર ન રહ્યા

રાજકોટ : રાજકોટ શહેરના કાલાવડ રોડ ઉપર મહિલા કોલેજ ચોકમાં જીએસટી અપીલ કમિશનરની ગાડીના કાચનો ચીપિયા મારી બુકડો બોલાવી દેનાર લોધિકાના વાગુદળ નજીક સરકારી જમીનમાં આશ્રમ બનાવનાર મહંત ઉપર રેવન્યુ તંત્રએ ગાજ ઉતારી દબાણ મુદ્દે નોટિસ આપવા છતાં હાજર નહીં રહેતા વધુ એક નોટિસ ફટકારી દબાણનો ઘડો લાડવો કરી નાખવા તજવીજ શરૂ કરી છે.

પ્રાપ્ત વિગતો મુજબ લોધીકાના વાગુદડની એક એકર જેટલી સરકારી જમીન ઉપર આશ્રમ ખડકી દેનાર મહંત ધર્મનાથજીએ રાજકોટમાં જીએસટી અપીલ કમિશનરની ગાડી ઉપર ચીપિયા વડે હુમલો કરી કાચ તોડી નાખ્યા બાદ ગુન્હો દાખલ કરવામાં આવ્યો હતો. સાથે જ સરકારી જમીન ઉપર દબાણના મુદ્દે લોધીકા મામલતદારે નોટિસ ફટકારી હતી પરંતુ કહેવાતા મહંત મુદતે હાજર ન રહેતા મામલતદારે વધુ એક નોટીસ ફટકારી તા.19ની મુદત આપી છે. જો આ મુદતે પણ મહંત ગેરહાજર રહેશે તો લોધીકા મામલતદાર દ્વારા દબાણ તોડી પાડવામાં આવનાર હોવાનું સૂત્રોએ જણાવ્યું હતું.