પુરુષોત્તમ રૂપાલા આજે રાજકોટમાં : ભવ્ય સ્વાગતની તૈયારી
પહેલા ત્રી-મંદિર પાસે અને પછી પારેવડી ચોકમાં થશે ભવ્ય સ્વાગત
૧૫૦ ફૂટ રીંગ રોડ ઉપર મધ્યસ્થ કાર્યાલયમાં કાર્યકરો સાથે કરશે વાર્તાલાપ
ભાજપના સુત્રો અનુસાર, રાજકોટના ઉમેદવાર જાહેર થયા પછી પરસોત્તમ રૂપાલા પહેલી વાર રાજકોટ આવી રહ્યા છે અને તેમને આવકારવા માટે શહેર અને જિલ્લા ભાજપના કાર્યકરો થનગની રહ્યા છે.
સૌ પહેલા કુવાડવા રોડ ઉપર ત્રી-મંદિર ખાતે તેમનું જિલ્લાના આગેવાનો દ્વારા સ્વાગત કરવામાં આવશે અને ત્યાર બાદ પારેવડી ચોક ખાતે શહેર ભાજપ દ્વારા ભવ્ય સ્વાગત કરવામાં આવશે.
ભાજપના જણાવ્યા અનુસાર, સવારે ૧૦ વાગ્યે પારેવડી ચોક ખાતે આતશબાજી સાથે પરસોત્તમ રૂપાલાનું સ્વાગત કરવામાં આવશે અને ત્યાર બાદ રેલી સ્વરૂપે તેઓ ૧૫૦ ફૂટ રોડ ઉપર આવેલા મોહનભાઈ કુંડારિયાનાં કાર્યાલય ખાતે જશે અને ત્યાં કાર્યકરોને સંબોધશે.
શહેર ભાજપના પ્રમુખ મુકેશ દોશી, મહામંત્રી માધવ દવે, વિરેન્દ્રસિંહ ઝાલા, અશ્વિન મોલિયા સહિતના અગ્રણીઓ તેમના સ્વાગતની તડામાર તૈયારી કરી રહ્યા છે.
