રાજકોટમાં સ્માર્ટ મીટરમાં બિલ વધુ આવતું હોવાનો લોકોનો દાવો

જો કે હજુ સુધી ખૂલીને નથી થયો વિરોધ: ‘વોઇસ ઓફ ડે’ દ્વારા જે લોકોના ઘરે-દુકાને સ્માર્ટ મીટર લાગ્યા છે તેઓના અભિપ્રાય લેવાયા: મોટેભાગે કહેવાયું, જૂના મીટર કરતાં સ્માર્ટ મીટરમાં બિલ વધુ આવશે

વડોદરામાં એમજીવીસીએલ દ્વારા સ્માર્ટ વીજ મીટર લગાવ્યા બાદ વીજબીલ વધુ આવતું હોવાના આક્ષેપો સાથે હોબાળો થયો હતો. જો કે રાજકોટમાં પણ સ્માર્ટ વીજ મીટર નાખવામાં આવ્યા છે. અહી લોકો ખૂલીને વિરોધ કરી રહ્યા નથી. પરંતુ સ્માર્ટ મીટર લાગ્યા બાદ બિલ વધુ આવે છે કે કેમ? તે અંગે ‘વોઇસ ઓફ ડે’ની ટીમ દ્વારા શહેરમાં મહિલા કોલેજ સબ ડિવિઝન વિસ્તારમાં જે લોકોના ઘરે તેમજ દુકાનમાં સ્માર્ટ મીટર લગાવવામાં આવ્યા છે તેમનો અભિપ્રાય લેવામાં આવ્યો હતો. જેમાં લોકોએ મોટા ભાગના લોકોએ કહ્યું હતું કે, જૂના મીટર કરતાં સ્માર્ટ મીટરમાં બિલ વધુ આવી રહ્યું છે. તો વળી કેટલાકે કહ્યું હતું કે, સ્માર્ટ મીટર લઈ જવા મારે જોતાં જ નથી. લોકોનું માનવું છે કે, જૂના મીટરમાં જે બે મહિને બિલ આવતું હતું તે સ્માર્ટ મીટર લાગ્યા બાદ એવું લાગી રહ્યું છે કે આ બિલ ડબલ થઈ જશે. મહત્વનું છે કે, રાજકોટમાં પણ લોકોને સ્માર્ટ મીટરમાં બિલ વધુ આવતું હોવાનું લાગી રહ્યું છે.

બે મહિને ૩હજારનું બિલ આવતું હતું, સ્માર્ટ મીટરમાં ૧૭ દી’માં ૧૫૦૦ રૂપિયાનું રિચાર્જ વપરાય ગયું: બકુલભાઈ ચોક્સી 

યુનિવર્સિટી રોડ પર આવેલા આશીર્વાદ એપાર્ટમેન્ટમાં રહેતા બકુલભાઈ ચોક્સીએ કહ્યું હતું કે, મારે ત્યાં સ્માર્ટ મીટર લાગ્યું છે. મે જૂના મીટરમાં ગત વર્ષે મે-જૂન મહિનામાં જે યુનિટ વપરાશ કર્યો હતો તેની સરખામણીએ સ્માર્ટ મીટરમાં યુનિટ વધી ગયા છે. હું ગત વર્ષે ૩/૪ યુનિટ વપરાશ કરતો હતો પરંતુ સ્માર્ટ મીટરમાં દૈનિક ૧૪-૧૫ યુનિટનો વપરાશ દેખાડે છે. સ્માર્ટ મીટર ૩/૫/૨૦૨૪ના રોજ લાગ્યું છે. ત્યારથી તા.૨૦/૫ સુધીમાં રૂ.૧૫૦૦નો વીજ વપરાશ થયો છે. તે જોતાં એવું લાગી રહ્યું છે કે બિલ વધુ આવી રહ્યું છે. મે ગત વર્ષે મે-જૂન મહિનામાં જે વીજ વપરાશ કર્યો હતો તે બિલના યુનિટ અને સ્માર્ટ મીટરમાં હાલના યુનિટની પણ સરખામણી કરી છે. જે જોતાં વધુ યુનિટ વપરાતા હોવાનું જણાય છે. ઉપરાંત ફ્લેટમાં સિનિયર સિટીઝનો રહે છે જેઓને એપ્લિકેશન ઓપરેટ કરતાં આવડતું નથી. આવી પણ મુશ્કેલી સર્જાય છે. જ્યારે ફ્લેટનું કોમન બિલ ભરવા માટે ઓનલાઈન ફેસએલિટી નથી. તે રોકડે થી જ ભરવું પડે છે.

જૂના મીટર કરતાં ડબલ બિલ આવે તેવું લાગી રહ્યું છે: કૃણાલભાઈ કાથરાણી 

ઉમિયા પાર્ક(ચોક), જલારામ-૧માં રહેતા કૃણાલભાઈ કાથરાણીએ પોતાના અભિપ્રાયમાં કહ્યું હતું કે, સ્માર્ટ મીટર નાખ્યા બાદ વીજ વપરાશ દેખાય છે. એપ્લિકેશનમાં મારો રેગ્યુલર વીજ વપરાશ વધારે દેખાડે છે. એસી, પંખા, વોશિંગ મશીન વગેરે ચાલુ રહેતા હોય તે સમયમાં ત્રણ-ચાર ગણો વીજ વપરાશ દેખાડે છે. મારો સામાન્ય વીજ વપરાશ ૧૬ થી ૨૦ યુનિટ છે પરંતુ સ્માર્ટ મીટરમાં ૫૦ યુનિટ બતાવે છે. જૂના મીટરમાં બે મહિને ૮ હજારનું બિલ આવતું હતું. ૯ દિવસ પહેલા સ્માર્ટ મીટર નાખવામાં આવ્યું છે. અત્યાર સુધીમાં ૩ હજારનું રિચાર્જ વપરાયું છે. જે જોતાં હવે બિલ બદલ થઈ જશે તેવું લાગે છે. તો બીજી તરફ જે લોકો સ્માર્ટ મીટર નાખવાની ઘસીને ના કહે છે ત્યાં સ્માર્ટ મીટર નાખવામાં આવતા નથી. તો ક્યાંક વ્હાલા દોહલાની નીતિ જેવુ લાગી રહ્યું છે.

મેસેજ દ્વારા ખબર પડી જાય છે કેટલો વીજ વપરાશ કર્યો: મિલનભાઈ પંડયા

સૌરાષ્ટ્ર કલા કેન્દ્ર રોડ પર જલારામ-૨માં રહેતા અને જીટીપીએલમાં નોકરી કરતાં મિલનભાઈ પંડયાએ કહ્યું હતું કે, સ્માર્ટ મીટર સારું છે. તેની એપ્લિકેશન દ્વારા આપણને ખબર પડે છે કે, આપણે કેટલો વીજ વપરાશ કરી રહ્યા છીએ. જો વધુ વીજ વપરાશ કરતાં હોય તો કરકસર કરવાની ખબર પડે છે. પીજીવીસીએલ દ્વારા એપ્લિકેશન દ્વારા મેસેજ કરવામાં આવે છે. કેટલું રિચાર્જ બાકી છે? કેટલા દિવસ રિચાર્જ ચાલશે? આ ઉપરાંત જરૂરિયાત મુજબ રિચાર્જ કરાવી શકીએ છીએ. ઘર બેઠા ઓનલાઈન પેમેન્ટ કરી શકીએ છીએ. એમણે એમ પણ કહ્યું હતું કે, બિલિંગ સાઇકલ રેગ્યુલર રહે છે. વધુ બિલ આવતું હોય તેવું લાગતું નથી.

સ્માર્ટ મીટર લઈ જાવ, નથી જોતાં અમારે: ઉમેશભાઈ તારવાણી

રહેણાંક મકાનો ઉપરાંત દુકાનોમાં પણ સ્માર્ટ મીટર લગાવવામાં આવેલા છે. ત્યારે યુનિવર્સિટી રોડ પર આવેલી એ ટુ ઝેડ પાન એન્ડ કોલ્ડડ્રિંક્સની દુકાન ધરાવતા વેપારી ઉમેશભાઈ તારવાણી તો સ્માર્ટ મીટરથી જાણે કંટાળી ગયા હોય તેવું લાગ્યું હતું. સ્માર્ટ મીટર કેવું છે ? તે અંગે પૂછતાં એમણે કહ્યું હતું કે, સ્માર્ટ મીટર લઈ જાવ, નથી જોતાં અમારે. રોજના ૫૦૦ રૂપિયા વપરાય છે. જૂના મીટરમાં બે મહિને ૨૨ થી ૨૩ હજાર બિલ આવતું હતું. સ્માર્ટ મીટર આવ્યા બાદ રોજના રૂ.૫૦૦ વપરાય છે એ જોતાં જૂના મીટર કરતાં સ્માર્ટ મીટરમાં ૩૦ હજાર સુધીનું બિલ વધુ આવશે તેવુ લાગી રહ્યું છે. અમારે ત્યાં તા.૧૫/૫એ સ્માર્ટ મીટર લાગ્યું છે અને તા.૨૦ સુધીમાં જ રૂ.૨૫૦૦નું રિચાર્જ વપરાય ગયું છે. એમણે તો એવું પણ કહ્યું હતું કે, અમે તો જૂના મીટરમાં કાયદેસર જ બિલ ભરતા હતા જે લોકો વીજ ચોરી કરે છે પહેલા ત્યાં આ સ્માર્ટ મીટર લગાવો.

જૂનું મીટર જ સારું હતું, અમે જૂના મીટર માટે અરજી કરીશું: ગિરીશભાઈ કોટેચા

યુનિવર્સિટી રોડ પર આવેલી સ્વસ્તિક સ્વીટ એન્ડ નમકીન નામની દુકાન ધરાવતા ગિરીશભાઈ કોટેચાએ સ્માર્ટ મીટર અંગે કહ્યું હતું કે, જૂનું મીટર હતું ત્યારે અમારે મહિને ૫૫૦૦ થી ૬૦૦૦ રૂપિયા વીજ બિલ આવતું હતું. જ્યારે સ્માર્ટ મીટર લાગ્યા બાદ રોજ ૪૦૦ થી ૫૫૦ જેટલું રિચાર્જ વપરાય છે. એ જોતાં એવું લાગી રહ્યું છે કે બિલ વધારે આવશે. સ્માર્ટ મીટર કરતાં તો જૂના મીટર જ સારા હતા. આ મીટરમાં બિલ વધારે આવતું હોય તેવું લાગી રહ્યું છે. એમણે વધુમાં કહ્યું હતું કે, સ્માર્ટ મીટર લાગ્યા તે પહેલા જે જૂનું બિલ આવશે તે અલગ થી જ આવશે. તેવું પીજીવીસીએલ દ્વારા અમને કહેવાયું છે. અમે તો પીજીવીસીએલમાં જૂના મીટર માટે અરજી પણ કરવાના છીએ.