મજા પડી ગઈ: પતંગ મહોત્સવમાં દેશ-વિદેશના પતંગવીરો ‘ખીલ્યા’
આવતીકાલે ઉતરાયણનો તહેવાર છે ત્યારે દરેક ધાબા-અગાશી ઉપરકાયપો છે…કાયપો છે’નો નાદ સંભળાવાનો છે. બીજી બાજુ રાજકોટ મહાપાલિકા દ્વારા દર વર્ષની માફક આ વર્ષે પણ આંતરરાષ્ટ્રીય પતંગ મહોત્સવનું આયોજન કરાયું હતું જેમાં દેશ-વિદેશના પતંગવીરોએ એક-એકથી ચડિયાતા પતંગ ઉડાવ્યા હતા. સવારથી જ ભારે પવન હોય એક ઝાટકે પતંગ ઉડવા લાગ્યા હતા. આ વખતે પણ અલગ-અલગ ડિઝાઈનના મહાકાય પતંગ આકાશમાં ચગ્યા હતા જેને નિહાળવા માટે મોટી સંખ્યામાં લોકો ઉમટી પડ્યા હતા.
આ પતંગ મહોત્સવમાં યુકે, યુએસ, નેધરલેન્ડ, રશિયા, આફ્રિકા સહિતના વિદેશી તો પંજાબ-રાજસ્થાન સહિતના રાજ્યોમાંથી પતંગવીરો આવી પહોંચ્યા હતા. આ કાર્યક્રમનો પ્રારંભ સાંસદ પરસોત્તમ રૂપાલા, રામભાઈ મોકરિયા, ડેપ્યુટી મેયર નરેન્દ્રસિંહ જાડેજા, સ્ટેન્ડિંગ કમિટી ચેરમેન જયમીન ઠાકર, શહેર ભાજપ પ્રમુખ મુકેશ દોશી, ધારાસભ્ય રમેશભાઈ ટીલાળા, ડૉ.દર્શિતાબેન શાહ, સમાજ કલ્યાણ સમિતિ ચેરમેન સુરેન્દ્રસિંહ વાળા, મ્યુનિસિપલ કમિશનર તુષાર સુમેરા સહિતનાની ઉપસ્થિતિમાં કરાયો હતો.
