ઝૂલતાપૂલ કેસમાં 14 માસના જેલવાસ બાદ જયસુખભાઈ પટેલને જામીન

સુપ્રીમકોર્ટે શરતી જામીન આપ્યા : 30 ઓક્ટોબર 2022મા ઝૂલતો પુલ તૂટી પડયાના ત્રણ મહિના બાદ જયસુખભાઈ પટેલે 30જાન્યુઆરી 2023માં કોર્ટમાં સામેથી હાજર થયા હતા

મોરબી : મોરબીમાં 135 નિર્દોષ લોકોનો જીવ લેનારી ઝૂલતાપૂલ દુર્ઘટનામાં મુખ્ય આરોપી જયસુખભાઈ પટેલને અંતે સુપ્રીમ કોર્ટમાંથી રાહત મળી છે, 14 માસ એટલે કે 416 દિવસથી વધુ સમય જેલમાં રહેલા જયસુખભાઈ પટેલના સુપ્રીમ કોર્ટ પાસપોર્ટ જમા કરાવી દેવા સહિતની શરતે રેગ્યુલર જામીન મંજુર કર્યાનું જાણવા મળે છે.

30 ઓક્ટોબર 2022ના રોજ મોરબીનો ઝૂલતોપુલ તૂટી પડતા 135 નિર્દોષ લોકોએ જીવ ગુમાવ્યો હતો. ઝૂલતા પુલ દુર્ઘટનામાં પોલીસે પુલનું સંચાલન અને સમારકામ કરનાર અજંતા ઓરવા કંપનીને જવાબદાર ઠેરવી ઓરેવના એમડી જયસુખભાઈ પટેલને મુખ્ય આરોપી ગણી કુલ 10 આરોપીઓ વિરુદ્ધ ગુન્હો નોંધી સરકાર દ્વારા સીટ મારફતે તપાસ શરૂ કરી હતી. બીજી તરફ નામદાર ગુજરાત હાઈકોર્ટે પણ સુઓમોટો રીટ દાખલ કરી સરકારને ઝાટકી નાખી હતી.

ઉલ્લેખનીય છે કે, જયસુખભાઈ પટેલ વતી સુપ્રીમકોર્ટમાં જામીન અરજીની સુનાવણીમાં સીનીયર એડવોકેટ મુકુલ રોહતગી હાજર રહ્યા હતા અને જસ્ટીસ અભય ઓકા તથા જસ્ટીસ ઉજલ ભયાનની બેંચ સમક્ષ એવી દલીલ કરી હતી કે જયસુખ પટેલ 14 મહિનાથી જેલમાં છે અને હજુ તેને કેટલો વખત જેલમાં રાખજો ? ટ્રાયલ તો ચાલતી જ રહેવાની જ છે.  દુર્ઘટનામાં તેનો કોઇ સીધો વાંક આવતો નથી. ઝુલતા પુલ દુર્ઘટનામાં ભોગ બનેલા લોકોના પરિવારો દ્વારા યુનિયન બનાવવામાં આવ્યું છે અને તેના વકીલ દ્વારા એવી દલીલ કરવામાં આવી હતી કે આરોપી પક્ષ દ્વારા વારંવાર ધમકી આપવામાં આવે છે એટલે જામીન અરજી મંજૂર ન રાખવામાં આવે ત્યારે અદાલત દ્વારા ધમકીના પુરાવા રજૂ કરવા જણાવવામાં આવ્યું હતું. અદાલતે કહ્યું કે ધમકી સામે હાઇકોર્ટે પોલીસ રક્ષણ આપ્યું જ છે છતાં કોઇ તકલીફ પડી છે કે કેમ ? તેવા સવાલ સામે પક્ષકારે કોઇ તકલીફનો ઇન્કાર કર્યો હતો. જેને પગલે સુપ્રિમ કોર્ટે જામીન મંજૂર રાખ્યા હતા. ઓરેવા ગ્રુપના જયસુખ પટેલ વતી રાજકોટના એડવોકેટ અનિલ દેસાઇ પણ હાજર રહ્યા હતા.

દરમિયાન 30 ઓક્ટોબર 2022મા ઝૂલતા પુલ દુર્ઘટના સર્જાયા બાદ ત્રણ મહિના સુધી નાસતા ફરતા જયસુખભાઈ પટેલે 30મી જાન્યુઆરી 2023ના રોજ મોરબી કોર્ટમાં શરણાગતિ સ્વીકારતા જેલમાં મોકલી આપવામાં આવ્યા હતા. જે બાદ રેગ્યુલર જામીન માટે હાઇકોર્ટ, નીચલી કોર્ટમાં કરેલી જામીન અરજી ફગાવી દેવામાં આવતા જયસુખભાઈ પટેલે નામદાર સુપ્રિમકોર્ટમાં રેગ્યુલર જામીન માટે અરજી કરતા સુપ્રીમ કોર્ટ પાસપોર્ટ જમા કરાવી દેવા સહિતની શરતોને આધીન જામીન અરજી મંજુર કરતા ઓરેવના એમડી જયસુખભાઈ પટેલને રાહત મળી છે.ઉલ્લેખનીય છે કે, મોરબી જેલમાં છેલ્લા 14માસ એટલે કે 416 કરતા વધુ સમયથી જેલવાસ ભોગવી રહેલા જયસુખભાઈ પટેલને સુપ્રિમમાંથી રાહત મળી છે પરંતુ હજુ જામીન હુકમ આવતા સમય લાગવાની સાથે કોર્ટ કાર્યવાહી સહિતની વિધિ બાદ હજુ પણ બે ચાર દિવસ બાદ જેલમુક્તિ મળે તેમ હોવાનું જાણકારો જણાવી રહ્યા છે.